ఆ మంత్రి వల్లే జగన్ సర్కార్ కుప్పకూలుతుంది.. జనసేన నేత సంచలనం

వైఎస్సార్ కాంగ్రెస్ పార్టీ ప్రభుత్వంపై జనసేన పార్టీ రాష్ట్ర అధికార ప్రతినిధి పోతిన వెంకట మహేష్ తీవ్ర స్థాయిలో విమర్శలు గుప్పించారు. ఈ మేరకు విజయవాడలో సోమవారం పోతిన మహేష్ మీడియాతో మాట్లాడుతూ.. గత తెలుగు దేశం పార్టీ హయాంలో ఆనాటి ఎమ్మెల్యే చింతమనేని ప్రభాకర్‌రావు.. ఎమ్మార్వో వనజాక్షిపై వ్యవహరించిన తీరుతో టీడీపీ ప్రభుత్వం కూలిపోయిందన్నారు. రాష్ట్ర దేవాదాయ శాఖ మంత్రి వెలంపల్లి శ్రీనివాసరావు, దుర్గగుడి ఈవో సురేష్ బాబు అవినీతి వల్ల ప్రస్తుత జగన్ ప్రభుత్వం కుప్పకూలితుందని జోస్యం చెప్పారు.

అన్యాయానికి అండగా నిలబడితే చరిత్ర పునరావృతం అవుతుందని పోతిన మహేష్ హెచ్చరించారు. తిరుపతి ఉప ఎన్నిక ప్రచార జాబితాలో మంత్రి వెలంపల్లి శ్రీనివాసరావు పేరు ఎందుకు చేర్చలేదని సీఎం జగన్‌ను పోతిన మహేష్ ప్రశ్నించారు. ఆలయాల భూములు, అమ్మవారి డబ్బులు వెలంపల్లి అడ్డంగా దోచేశారని తీవ్ర ఆరోపణలు చేశారు.

మంత్రి వెలంపల్లితో ప్రచారం చేయిస్తే తిరుపతి ఉప ఎన్నికల్లో ఇబ్బంది కలుగుతుందనే ఆయన్ను దూరం పెట్టారని పోతిన మహేష్ ఆరోపించారు. ఈ విషయాన్ని సీఎం జగన్ పూర్తిగా నమ్మారని, అందుకే వెలంపల్లి పేరు తిరుపతి ఉప ఎన్నిక ప్రచారంలో చేర్చలేదని పోతిన వెంకట మహేష్ వ్యాఖ్యానించారు.