విజయవాడ: పిల్లలు వాంతులు చేసుకుంటున్నారని అడిగితే.. షాకిచ్చిన తల్లి

పిల్లలు వాంతులు చేసుకుంటున్నారేంటి అని అడిగిన స్థానికులకు మతిస్థిమితం లేని తల్లి ఊహించని షాకిచ్చింది. భోజనంలో విషం కలిపానని.. తాను కూడా తిన్నానని చెప్పడంతో కంగుతిన్నారు. వెంటనే తేరుకుని తల్లితో సహా పిల్లలను ఆస్పత్రికి తరలించడంతో ప్రాణాపాయం తప్పింది. ఈ షాకింగ్ ఘటన కృష్ణా జిల్లాలో జరిగింది. ఈ ఘటనపై పోలీసులు కేసు నమోదు చేశారు. పోలీసులు తెలిపిన వివరాల మేరకు..

కంకిపాడు మండలం పునాదిపాడుకి చెందిన కనక భవానికి ఇద్దరు పిల్లలు జ్యోతి(7), కుమార్(5). ఆమెకు కొద్దికాలంగా మతిస్థిమితం లేదు. మధ్యాహ్న భోజనం అనంతరం ఇద్దరు చిన్నారులు వాంతులు చేసుకోవడం గమనించిన స్థానికులు ఏమైందని ఆరా తీశారు. మతిస్థిమితం లేని కనక భవాని చెప్పిన విషయం విని షాకయ్యారు. భోజనంలో ఎలుకల మందు కలిపి పెట్టానని.. తాను కూడా తిన్నానని చెప్పడంతో వెంటనే అప్రమత్తమయ్యారు.

తల్లి కనకభవాని, ఆమె ఇద్దరు చిన్నారులను వెంటనే విజయవాడ ప్రభుత్వాస్పత్రికి తరలించారు. పరీక్షించిన వైద్యులు వెంటనే చికిత్స అందించడంతో ప్రాణాపాయం తప్పింది. ప్రస్తుతం వారి ఆరోగ్య పరిస్థితి నిలకడగా ఉంది. ఆస్పత్రి వర్గాల నుంచి అందిన సమాచారం మేరకు పోలీసులు ఆత్మహత్యాయత్నం కేసు నమోదు చేసి విచారణ చేపట్టారు.

Also Read: