పోలీస్ స్టేషన్‌కి తాళం వేస్తా.! స్వామీజీ ఫైర్, వెనక్కి తగ్గిన ఖాకీ.. షాకింగ్ ఘటన

విజయనగరం జిల్లా రామతీర్థంలో రాముడి విగ్రహ ధ్వంసం ఘటన ఏపీలో ప్రకంపనలు రేపుతోంది. హిందూ సంఘాలు, బీజేపీ ప్రత్యక్ష ఆందోళనకు సిద్ధమయ్యాయి. అందులో భాగంగా ఛలో రామతీర్థం పిలుపునిచ్చిన విషయం తెలిసిందే. రామతీర్థంలో ఉద్రిక్త పరిస్థితుల నేపథ్యంలో పోలీసులు ఛలో రామతీర్థానికి అనుమతుల్లేవంటూ పీఠాధిపతులు, బీజేపీ నేతలు, హిందూ సంఘాల నాయకులను ఎక్కడికక్కడ అడ్డుకున్నారు. హౌస్ అరెస్టులు కూడా చేశారు.

పోలీసుల నిర్బంధ చర్య విజయనగరంలో ఉద్రిక్తతకు దారితీసింది. గుంటూరు జిల్లా తాళ్లాయపాలెం శైవ క్షేత్రం పీఠాధిపతి శివస్వామి రామతీర్థం వెళ్లేందుకు విజయనగరం చేరుకున్నారు. పంచముఖ ఆంజనేయ స్వామి గుడిలో ఉన్న శివస్వామిని ముందస్తు జాగ్రత్త చర్యల్లో భాగంగా పోలీసులు ఆలయంలో అడ్డుకున్నారు. అయితే స్వామీజీ, ఆయన పరివారం ఆలయం దాటి బయటకు పోకుండా దేవాలయం గేటుకి తాళాలు వేయడం ఘర్షణకు దారితీసింది. ఆలయానికి తాళం వేయడంపై శివస్వామి తీవ్ర ఆగ్రహం వ్యక్తం చేశారు. తాము రామతీర్థం వెళ్తే అడ్డుకుని మీ డ్యూటీ మీరు చేయండి.. అంతేకానీ ఆలయ గేటుకి తాళం వేయడమేంటని ఆగ్రహం వ్యక్తం చేశారు.

పీఠాధిపతులను ఆలయంలో పెట్టి తాళాలు వేస్తారా? తాళాలు వేసి గుడిలో దేవుడిని కూడా బంధిస్తారా అంటూ అంటూ తీవ్రస్థాయిలో విరుచుకుపడ్డారు. ఆలయానికి తాళాలు వేసే అధికారం ఎవరిచ్చారంటూ నిలదీశారు. తాను పోలీస్ స్టేషన్‌కి తాళాలు వేస్తానని.. ఊరుకుంటారా అని ప్రశ్నించారు. తాళాలు తీయాల్సిందేనంటూ పట్టుబట్టారు. దీంతో పోలీసు అధికారి వెనక్కుతగ్గారు. తాళాలు తీయాల్సిందిగా సిబ్బందికి సూచించడంతో గొడవ సద్దుమణిగింది. స్వామీజీ పోలీసులపై ఆగ్రహం వ్యక్తం చేస్తున్న వీడియో వైరల్‌గా మారింది. అయితే ఈ ఘటనకు సంబంధించిన పూర్తి వివరాలు తెలియాల్సి ఉంది.

Also Read: