'చంద్రబాబు కాక మీ అయ్య ఇచ్చాడా.. మీ తాత ఇచ్చాడా..'

వైఎస్సార్ ఆసరా పథకంపై ప్రభుత్వం అనవసర ఆర్భాటాలు చేస్తుందని.. ఇది ఆసరా కాదని జగనన్న టోకరా అంటూ టీడీపీ తెలుగు మహిళా అధ్యక్షురాలు వంగలపూడి అనిత ఎద్దేవా చేశారు. ఆసరా అంటూ మహిళలపై మోసపు వల విసురుతున్నారని.. మహిళలు కూడా జాగ్రత్తగా గమనించాలని ఆమె అన్నారు. ఆసరా పేరుతో ప్రభుత్వ మోసాలపై చర్చకు సిద్ధం అంటూ ఆదివారం జూమ్ మీడియా సమావేశంలో ఆమె సవాల్ విసిరారు.

ఈ రోజు వరకు నాలుగు విడతలో మీరు రుణమాఫీ చేస్తామని చెప్తున్న రుణాలన్నీ చంద్రబాబు నాయుడు హయంలో ఇచ్చిన రుణాలు కాకపోతే మీ అయ్యిచ్చిన రుణాలా లేక మీ తాతిచ్చిన రుణాలా చెప్పండంటూ అనిత తనదైన శైలిలో ప్రశ్నించారు. చెట్టు పేరు చెప్పి కాయలు అమ్ముకుంటున్నారని.. డ్వాక్రా అనేది చంద్రబాబు నాయుడు ఏ నాడో నాటిన విత్తనమన్నారు. చంద్రబాబు నాయుడు హయాంలో రుణాలే ఇవ్వకపోతే ఇప్పుడు మీరు తీరుస్తున్న అప్పు ఎవరదంటూ మంత్రులను ప్రశ్నించారు.

రెండు మూడు రోజులుగా భజన బృందం, మంత్రులు గానీ మహిళలకు ఏదో లాభాలు చేకూరుస్తున్నామని ఊకదంపుడు ప్రసంగాలు చేస్తుంటే మీడియా ముందుకు వచ్చానన్నారు. ఇది మహిళలకు ఆసరా కాదని జగనన్న టోకరా అంటూ విమర్శించారు. వడ్డీలేని రుణాలను రూ.7 లక్షల వరకు చేస్తామని పాదయాత్ర సమయంలో ఇచ్చిన హామీ ఏమైందంటూ ముఖ్యమంత్రిని ప్రశ్నించారు. ఆడవాళ్లకి అన్నీ అర్థమవుతున్నాయని.. వాళ్ల టైం వచ్చినప్పుడు కచ్చితంగా చూపిస్తారని.. మీరు చూస్తూ ఉండండంటూ హెచ్చరించారు.