విజయవాడవాసులకు అలర్ట్.. గురువారం ట్రాఫిక్ ఆంక్షలు, వివరాలివే

విజయవాడవాసులకు ముఖ్య గమనిక.. గురువారం నగరంలో ట్రాఫిక్ ఆంక్షలు అమల్లో ఉంటాయి. పౌరసరఫరాల శాఖ నూతన వాహనాల ప్రారంభోత్సవం ఉండటంతో.. ఈ కార్యక్రమానికి ముఖ్యమంత్రి వై.ఎస్‌.జగన్‌మోహన్‌రెడ్డి హాజరవుతున్నారు. ఈ నెల 21న బెంజిసర్కిల్‌ మీదుగా రాకపోకలు సాగించే వాహనాలను ఇతర మార్గాల ద్వారా మళ్లిస్తున్నట్లు సీపీ శ్రీనివాసులు తెలిపారు. 21న ఉదయం 5 గంటల నుంచి మధ్యాహ్నం 12 గంటల వరకు మళ్లింపులు ఉంటాయన్నారు. 20 తేదీ రాత్రి 9 గంటల నుంచి 21న మధ్యాహ్నం 12 గంటల వరకు బెంజిసర్కిల్‌ నుంచి ఆర్టీసీ వై జంక్షన్‌ వరకు ఎలాంటి వాహనాలను అనుమతించరని తెలిపారు.

చెన్నై నుంచి విశాఖపట్నం, ఇబ్రహీంపట్నం వైపు వెళ్లే వాహనాలను ఒంగోలు-త్రోవగుంట-బాపట్ల-అవనిగడ్డ- చల్లపల్లి-పామర్రు- గుడివాడ- హనుమాన్‌జంక్షన్‌ మీదుగా ఇబ్రహీంపట్నం వైపు మళ్లిస్తారు. ఏలూరు నుంచి హైదరాబాద్‌ వెళ్లే భారీ వాహనాలను హనుమాన్‌జంక్షన్‌ నుంచి నూజివీడు-మైలవరం-జి.కొండూరు- ఇబ్రహీంపట్నం మీదుగా మళ్లింపు. ఏలూరు నుంచి చెన్నై వైపు వెళ్లే భారీ వాహనాలను హనుమాన్‌జంక్షన్‌-గుడివాడ- పామర్రు-చల్లపల్లి-అవనిగడ్డ-బాపట్ల- త్రోవగుంట- ఒంగోలు మీదుగా వస్తాయి.

గుంటూరు వైపు నుంచి విశాఖపట్నం, హైదరాబాద్‌ వైపు వెళ్లే కార్లు, ఇతర చిన్న వాహనాలను 21న ఉదయం 8 నుంచి 12 వరకు కనకదుర్గమ్మ వారధిపై అనుమతించరు. మంగళగిరి, తాడేపల్లి, ప్రకాశంబ్యారేజీ మీదుగా విజయవాడలోకి మళ్లిస్తారు. తాడిగడప వైపు నుంచి వచ్చే కార్లు, ఇతర వాహనాలను ఎన్టీఆర్‌ సర్కిల్‌ వరకు అనుమతించి.. అక్కడ నుంచి గుంటూరు వెళ్లే వాహనాలను రామలింగేశ్వరనగర్‌ మీదుగా కృష్ణలంక హైవే వైపు మళ్లింపు. విజయవాడ వైపు వెళ్లే వాహనాలను ఎన్టీఆర్‌ సర్కిల్‌ నుంచి నిర్మలా కాన్వెంట్‌ రోడ్డు, రమేష్‌ ఆసుపత్రి, రామవరప్పాడు రింగ్‌ మీదుగా నగరంలోకి. రామవరప్పాడు వైపు నుంచి వచ్చే కార్లు, ఇతర చిన్న వాహనాలను రమేష్‌ ఆసుపత్రి వరకు మాత్రమే అనుమతిస్తారు. ఏలూరు నుంచి పీఎన్‌బీఎస్‌కు వచ్చే బస్సులను రామవరప్పాడు రింగ్‌ మీదుగా కారల్‌మార్క్స్‌రోడ్డు, పోలీసు కంట్రోల్‌రూమ్ మీదుగా పీఎన్‌బీఎస్‌కు, పీఎన్‌బీఎస్‌ నుంచి ఏలూరు వెళ్లే వాహనాలను ఇదే మార్గంలో వెనక్కి. ఈ మార్పులను గమనించి తమకు సహకరించాలని పోలీసులు కోరుతున్నారు.