విజయవాడ ప్రజలకు షాక్.. న్యూ ఇయర్ వేడుకలు లేనట్లే.. మద్యం అమ్మకాలపై ట్విస్ట్!

విజయవాడ ప్రజలకు నగర పోలీసు కమిషనర్ ఊహించని షాకిచ్చారు. నూతన సంవత్సర వేడుకలకు విజయవాడలో అనుమతులు లేవని నగర పోలీస్‌ కమిషనర్‌ బత్తిన శ్రీనివాసులు వెల్లడించారు. ఇంట్లోనే కొత్త సంవత్సర వేడుకలు జరుపుకోవాలని నగర ప్రజలకు సూచించారు. ప్రతి ఏడాది విజయవాడ నగరం కొత్త సంవత్సర వేడుకలు ఘనంగా జరుగుతాయి. వీధులన్నీ విద్యుత్ కాంతులతో, యువత కేరింతలు, వేడుకలతో బెజవాడ వీధుల్లో పండుగ వాతావరణం నెలకొంటుంది.

అయితే రాష్ట్రంలో కొవిడ్‌ రెండో దశ, కరోనా కొత్త రకం స్ట్రెయిన్‌ వ్యాప్తి దృష్ట్యా న్యూ ఇయర్ వేడుకలను నిషేధిస్తూ నిర్ణయం తీసుకున్నట్లు సీపీ బత్తిన శ్రీనివాసులు చెప్పారు. ఇందులో భాగంగా నగరంలోని బందరు రోడ్డులో జనాలు గుమిగూడడం, రోడ్లపై కేక్‌ కోయడం లాంటివి నిషేధించినట్లు తెలిపారు. ఈ నెల 31వ తేదీన రాత్రి 10 గంటల్లోగా నగరంలోని వ్యాపార సంస్థలు, దుకాణాలు మూసివేయాలని ఆదేశించారు. హోటళ్లు, ఫంక్షన్‌ హాళ్లు, ఇతర సంస్థల్లోనూ ఎలాంటి వేడుకలను నిర్వహించడానికి వీల్లేదని తేల్చి చెప్పారు.

అలాగే మద్యం అమ్మకాలపై కూడా సీపీ శ్రీనివాసులు ట్విస్ట్ ఇచ్చారు. లిక్కర్ షాపులు రాత్రి 8 గంటల వరకు, బార్ అండ్ రెస్టారెంట్లు రాత్రి 11 గంటల వరకు మాత్రమే ప్రభుత్వ అనుమతుల ప్రకారం పనిచేస్తాయని తెలిపారు. అలాగే 21 సంవత్సరాల లోపు వారికి మద్యం అమ్మడానికి వీల్లేదని స్పష్టం చేశారు. అలాగే బార్‌ అండ్ రెస్టారెంట్లలో అశ్లీల నృత్యాలు జరిగితే చట్టరీత్యా శిక్షార్హమని.. వేడుకల పేరిట మహిళల పట్ల అసభ్యకరంగా ప్రవర్తించినా, ఇతరుల మనోభావాలు దెబ్బతినేలా ప్రవర్తించినా కఠిన చర్యలుంటాయని హెచ్చరించారు. బహిరంగ ప్రదేశాలలో బాణసంచా కాల్చి పొరుగువారికి ఇబ్బంది కలిగించరాదన్నారు. ముఖ్యంగా ఈ నూతన సంవత్సర వేడుకల సందర్భంగా మద్యం సేవించి వాహనం నడపరాదని, సీటు బెల్టు, హెల్మెట్ ధరించని వారి వాహనాలు సీజ్ చేస్తామని స్పష్టం చేసారు. ప్రార్ధనా మందిరాల్లో కోవిడ్ నియమాలు తప్పనిసరిగా పాటించాలని సూచించారు. కోవిడ్ నిబంధనలు పాటించని వారిపట్ల చర్యలు తీసుకుంటామని వెల్లడించారు.