విజయవాడ చరిత్రలో తొలిసారి.. ఓ మహిళ నగర బహిష్కరణ!

విజయవాడ చరిత్రలో తొలిసారి ఓ మహిళను పోలీసులు నగర బహిష్కరణ చేశారు. ఓ మహిళకు నగర బహిష్కరణ శిక్ష విధించడం హాట్ టాపిక్‌గా మారింది. సారమ్మ అలియాస్‌ శారద అనే మహిళ.. పోలీసుల కళ్లుగప్పి దందాలు చేయడంలో దిట్ట. ఇప్పటికే సారమ్మపై అజిత్‌సింగ్‌ నగర్‌ పీఎస్‌లో 13 కేసులున్నాయి. గంజాయి అమ్మకాలు సహా చాలా వివాదాల్లో ఈమె ప్రమేయం ఉంది. ఈ క్రమంలో శారమ్మపై పోలీసులు నిఘా పెట్టారు. ఆమెపై ఎన్ని కేసులు పెట్టినా ఏ మాత్రం మార్పు రాలేదు.


అయితే ఎన్నిసార్లు హెచ్చరించినా, కేసులు పెట్టినా శారద తీరు మారకపోవడంతో పోలీసులు ఓ నిర్ణయానికి వచ్చారు. ఆమెపై కఠిన శిక్షకు సిద్ధమయ్యారు. సారమ్మ అలియాస్‌ శారదకు చివరికి నగర బహిష్కరణే మార్గమని పోలీసులు భావించారు. ఆమెతో పాటు మరో 19 మందిని విజయవాడ నుంచి బహిష్కరించారు.

కాగా, ఇటీవల వరుసగా వెలుగు చూస్తున్న గంజాయి కేసులు ఆందోళన రేకెత్తిస్తున్నాయి. ఈ నేపథ్యంలోనే గంజాయి విక్రయాలపై ఉక్కుపాదం మోపేందుకు విజయవాడ పోలీసులు నగర బహిష్కరణ అస్త్రాన్ని బయటకు తీశారు. మరోసారి వీళ్లు గంజాయి కేసుల్లో దొరికితే కఠిన చర్యలు ఉంటాయని సీపీ క్రాంతి రాణా టాటా వార్నింగ్‌ ఇచ్చారు. నగర బహిష్కరణకు గురైన వారిలో సారమ్మ అనే మహిళ ఉండడం.. తొలిసారిగా ఓ మహిళపై సీరియస్‌ యాక్షన్‌ ఉండటం హాట్ టాపిక్‌గా మారింది.