మీరు ఆన్‌లైన్ షాపింగ్ చేస్తున్నారా..? ఈ సైట్ల జోలికి వెళ్లకండి

దసరా, దీపావళి పండుగలను పురస్కరించుకుని ప్రజలు భారీ ఎత్తున షాపింగ్ చేస్తున్నారు. పండుగల సీజన్‌ను క్యాష్ చేసుకునేందుకు ఆన్‌లైన్ షాపింగ్ పోర్టల్స్ క్రేజీ ఆఫర్లు ప్రకటిస్తున్నాయి. ఈ ఆఫర్లకు ఆకర్షితులై వినియోగదారులు.. తమకిష్టమైన వాటిని ఆన్‌లైన్‌లో బుక్ చేస్తు్న్నారు.

అమెజాన్, ఫ్లిప్‌కార్ట్, ఈబే, మింత్ర తదితర వెబ్‌సైట్లను ఎక్కువ మంది వినియోగదారులు సందర్శిస్తున్నారు. ఈ పోర్టల్స్ నుంచి పెద్ద ఎత్తున ఆన్‌లైన్ షాపింగ్ జరుగుతోంది. అయితే ఇదే అదనుగా చూసుకుని.. ఆన్‌లైన్ కేటుగాళ్లు రెచ్చిపోయిందుకు రెడీగా ఉన్నారు. భారీ ఆఫర్ల ప్రకటిస్తూ.. వినియోగదారులను నకలీ సైట్లలోకి రప్పిస్తున్నారు. ప్రముఖ సైట్ల పేరుకు చివరిలో వేరే అక్షరాలు యాడ్ చేసి.. వినియోగదారుల జేబుల చిల్లుల పెట్టేందుకు మాటు వేసుకుని ఉన్నారు.

ఇలాంటి నకిలీ వెబ్‌సైట్ల పట్ల అప్రమత్తంగా ఉండాలని విజయవాడ సిటీ పోలీసులు హెచ్చరిస్తున్నారు. ఫేక్ ఈ-కామర్స్ వెబ్‌సైట్లలో షాపింగ్ చేయవద్దని సూచించారు. అనుమానం వస్తే 73289 09090 నంబరుకు వాట్సప్ చేయాలని కోరారు. వస్తువులు తక్కువకు వస్తున్నాయని ఆశపడి మోసపోకండని చెప్పారు.

అదేవిధంగా కేవైసీ పేరుతో వచ్చే కాల్స్‌కు స్పందించవద్దని పోలీసులు కోరారు. గుర్తు తెలియని వ్యక్తులతో మీ వ్యక్తిగత సమాచారం షేర్ చేసుకోవద్దని సూచించారు. ఎలాంటి పిన్, ఓటీపీ, బ్యాంక్ అకౌంట్ల గురించి చెప్పవద్దన్నారు. అప్రమత్తంగా ఉండాలని.. కేటుగాళ్ల మాయలో పడొద్దని సూచించారు.