మంత్రి పదవి నాకు వెంట్రుకతో సమానం.. నన్ను మాజీగా పిలవొద్దు: కొడాలి నాని

మంత్రి పదవి పోయిన తర్వాత కొద్ది రోజులుగా సైలెంట్‌గా ఉన్న గుడివాడ వైసీపీ ఎమ్మెల్యే కొడాలి నాని.. మరోసారి తనదైన శైలిలో కామెంట్స్ చేసి వార్తల్లో నిలిచారు. మంత్రి పదవి తనకు వెంట్రుక ముక్కతో సమానమని తీవ్ర వ్యాఖ్యలు చేశారు. తనను మాజీ మంత్రి అని పిలవవద్దని, గుడివాడ ఎమ్మెల్యేగా ఉండటమే తనకు ఇష్టమని కొడాలి నాని తేల్చి చెప్పారు.

కృష్ణాజిల్లా గుడివాడ మండలంలోని దొండపాడు గ్రామంలో ఏర్పాటు చేసిన బాబు జగ్జీవన్‌రామ్ విగ్రహాన్ని బాపట్ల వైసీపీ ఎంపీ నందిగం సురేష్‌తో కలిసి కొడాలి నాని ఆవిష్కరించారు. అనంతరం కొడాలి నాని మీడియాతో మాట్లాడుతూ.. తెలుగు దేశం పార్టీ అధినేత చంద్రబాబునాయుడుపై తనదైన శైలిలో విరుచుకుపడ్డారు. చంద్రబాబు లాంటి వ్యక్తులు పదవి కోసం ఎంతకైనా దిగజారుతారన్నారు.

తనకు మంత్రి పదవి వెంట్రుక ముక్కతో సమానమని కొడాలి నాని వ్యాఖ్యానించారు. మంత్రి పదవి పోయినందుకు తనకు ఎలాంటి బాధ లేదని.. ఎమ్మెల్యే పదవి పోతేనే బాధపడతానని పేర్కొన్నారు. సీఎం జగన్మోహన్ రెడ్డితో కలిసి పని చేయడమే తన ముఖ్య లక్ష్యమని తేల్చి చెప్పారు. ఇక, ఆంధ్రప్రదేశ్ రాష్ట్రం.. మరో శ్రీలంకలా అవుతుందని విపక్షాలు విష ప్రచారం చేస్తున్నాయని తీవ్ర ఆగ్రహం వ్యక్తం చేశారు.

వాస్తవానికి జగన్మోహన్ రెడ్డి ముఖ్యమంత్రి కాకపోయి ఉంటే ఇప్పటికే రాష్ట్రం తీవ్ర అవస్థల పాలయ్యేదని కొడాలి నాని అభిప్రాయపడ్డారు. బాబు జగ్జీవన్‌రామ్ జీవితాన్ని ఆదర్శంగా తీసుకొని ఊపిరి ఉన్నంతకాలం ప్రజా ప్రతినిధిగా ఉండేందుకు ప్రయత్నిస్తానని కొడాలి నాని ధీమా వ్యక్తం చేశారు. చంద్రబాబు, పవన్ కల్యాణ్‌లు ప్రభుత్వం చేస్తున్న మంచిని ఓర్చుకోలేక రాష్ట్రమంతా తిరుగుతూ విషప్రచారం చేస్తున్నారని ఎంపీ నందిగం సురేష్ ఆరోపించారు.