పోలీసులపై అనుచిత వ్యాఖ్యలు.. మాజీ మంత్రి అయ్యన్న పాత్రుడిపై కేసు

మాజీ మంత్రి అయ్యన్న పాత్రుడిపై కేసు నమోదైంది. నర్సీపట్నంలో పోలీసుల పట్ల దురసుగా వ్యవహరించిన ఆయనపై సెక్షన్ 353తోపాటు మరికొన్ని సెక్షన్ కింద పోలీసులు కేసు నమోదు చేశారు. నర్సీపట్నంలో మరిడిమాంబ ఉత్సవాల సందర్భంగా అయ్యన్న చేసిన వ్యాఖ్యలను పోలీసులు తీవ్రంగా పరిగణించారు. అంతేకాకుండా పండుగ అనుమతుల కోసం ఏఎస్పీ మణికంఠ ఛందోలును అయ్యన్న పాత్రుడు కలిసినప్పుడు.. ఏఎస్పీ పట్ల అయ్యన్న హేళనగా మాట్లాడినట్లు సమాచారం.

ఇటీవల నర్సీపట్నంలో జరిగిన మరిడిమాంబ ఉత్సవాలకు పోలీసులు రాత్రి 11 గంటల వరకు అనుమతి ఇచ్చారు. అయితే అర్ధరాత్రి దాటినా కార్యక్రమాలు కొనసాగడంతో.. పోలీసులు ఆపేయాలని ఆదేశాలు చేశారు. ఈ సమయంలో మాజీ మంత్రి అయ్యన్న పాత్రుడు అక్కడికి చేరుకుని.. ఉత్సవాలు నిర్వహించి తీరుతామని స్పష్టంచేశారు. ఆయన దగ్గర ఉండి ఉత్సవాలు నిర్వహించారు. ఈ సందర్భంగా అయ్యన్న పోలీసుల పట్ల వ్యాఖ్యలపై కేసు నమోదైంది.

మరిడిమాంబ ఉత్సవాల నిర్వహణకు ఏఎస్పీ అనుమతి ఇవ్వలేదని అయ్యన్న పాత్రుడు ఇదివరకే ఆరోపించిన విషయం తెలిసిందే. గతేడాది కరోనా కారణంగా ఉత్సవాలు నిర్వహించుకోలేదని.. ఈసారి ఘనంగా చేద్దామంటే పోలీసులు అడ్డుకుంటున్నారని ఆయన మండిపడ్డారు. అధికార పార్టీ నేతలకు రికార్డింగ్ డ్యాన్సులు చేసుకునేందుకు అనుమతి ఇచ్చిన పోలీసులు.. తమను ఎందుకు అడ్డుకుంటున్నారని అయ్యన్న ఆగ్రహం వ్యక్తంచేశారు.