సబ్బం హరి ఆరోగ్య పరిస్థితి విషమం.. ఆస్పత్రిలో చికిత్స!

విశాఖపట్నం మాజీ మేయర్, అనకాపల్లి మాజీ ఎంపీ సబ్బం హరి ఆరోగ్య పరిస్థితి ఆందోళనకరంగా ఉన్నట్లు తెలుస్తోంది. ఇటీవలే కరోనా వైరస్ మహమ్మారి బారిన పడ్డ సబ్బం హరి.. విశాఖలోని ఓ ప్రైవేటు ఆస్పత్రిలో ఆయన చికిత్స తీసుకుంటున్నారు. అయితే ప్రస్తుతం ఆయన ఆరోగ్య పరిస్థితి విషమంగా ఉందని వైద్యులు చెబుతున్నారు. గత మూడు రోజులుగా సబ్బం హరి ఆస్పత్రిలో చికిత్స తీసుకుంటున్నారు.

ఇటీవలే సబ్బం హరికి కరోనా పాజిటివ్‌గా నిర్ధారణ అయిన విషయం తెలిసిందే. ఈ విషయాన్ని స్వయంగా ఆయనే వెల్లడించారు. ఈ నెల 15వ తేదీన కరోనా పాజిటివ్‌ నివేదిక రాగా, వైద్యుల సూచన మేరకు మూడు రోజులు హోం క్వారంటైన్‌లో ఉన్నారు. ఆ తర్వాత ఆస్పత్రిలో చేరారు. అయితే, ప్రస్తుతం ఆయన పరిస్థితి విషమంగా ఉన్నట్లు సమాచారం. కాగా, సబ్బం హరికి కోవిడ్‌తో పాటు ఇతర ఇన్‌ఫెక్షన్లు కూడా ఉన్నట్లు వైద్యులు తెలిపారు. ప్రస్తుతం ఆయనకు వెంటిలేటర్‌పై చికిత్స అందిస్తున్నారు.