బాలిక ఆత్మహత్య కేసు.. ప్రవర్తనపై ఆరా తీయగా.. షాకింగ్

తనకు ఇష్టం లేని డ్యాన్స్ క్లాస్‌లకు వెళ్లలేక ఓ బాలిక ఆత్మహత్యకు పాల్పడింది. విశాఖ నాలుగో పట్టణ పరిధి దొండపర్తిలో సోమవారం రాత్రి బాలిక ఆత్మహత్య చేసుకోగా.. పోలీసులు అనుమానాదస్పద మృతిగా కేసు నమోదు చేసుకుని దర్యాప్తు ప్రారంభించారు. మంగళవారం బాలిక మృతి వివరాలు వెల్లడించారు.

దొండపర్తికి చెందిన బాలిక గతంలో డ్యాన్స్ ఇనిస్టిట్యూట్‌లో కూచిపూడి నృత్యం నేర్చుకునేది. తనకు డ్యాన్స్ అంటే ఇష్టం లేకున్నా.. తల్లిదండ్రులు చెప్పడంతో బలవంతంగా హాజరయ్యేది. అయితే కరోనా కారణంగా ఇన్నాళ్లు ఆన్‌లైన్‌లోనే నేర్చుకునేది. మంగళవారం నుంచి మళ్లీ ఇనిస్టిట్యూట్‌లో డ్యాన్స్ తరగతులు ప్రారంభమవుతున్నాయని తెలిసి బాలిక మనోవేదనకు గురైంది.

దీంతో డ్యాన్స్ క్లాస్‌లకు వెళ్లడం ఇష్టం లేని ఆ బాలిక.. సోమవారం రాత్రి ఇంట్లో అందరూ నిద్రిస్తుండగా ఆత్మహత్యకు పాల్పడింది. ఇంట్లో ప్రవర్తనపై, బాలిక చదివే పాఠశాలలో ఆమె ఎలా ఉంటుందనే విషయాలు ఆరా తీసిన పోలీసులు.. డ్యాన్స్ క్లాస్‌లకు వెళ్లడం ఇష్టంలేకనే ఆత్మహత్యకు పాల్పడినట్లు తెలిపారు. బాలిక మృతదేహానికి పోస్టుమార్టం నిర్వహించిన అనంతరం.. తల్లిదండ్రులకు అప్పగించారు.