విషాదం: మరణంలోనూ భార్యకు తోడుగా.. గంట వ్యవధిలో గుండెపోటుతో దంపతులు మృతి

భార్య మరణాన్ని తట్టుకోలేకపోయిన ఓ వ్యక్తి.. మరణంలోనూ ఆమె తోడయ్యారు. కష్ట సుఖాల్లో అండగా ఉంటానని పెళ్లినాడు చేసిన ప్రమాణాన్ని తూచా తప్పకుండా పాటించి ఆమె వెంటే నడిచాడు. తుదిశ్వాస వరకూ వెన్నంటి ఉంటానని బాస చేసిన ఆ భర్త మరణంలో భార్య చేయి వీడలేదు. ఈ విషాదకర ఘటన విజయనగరం జిల్లా ఎస్‌.కోటలోని పందిరప్పన్న కూడలిలో శనివారం రాత్రి చోటుచేసుకుంది. ఎల్ఐసీ డెవలప్‌మెంట్ ఆఫీసర్‌గా పనిచేస్తున్న మనోహర్‌ (56), తన భార్య సూర్య ప్రభావతి(47), కుమారుడితో పందిరప్పన్న కూడలి వద్ద నివాసం ఉంటున్నారు.

అర్దరాత్రి ఒంటి గంట సమయంలో బాత్ రూమ్‎లోకి వెళ్లిన భార్య ప్రభావతి ఒక్కసారిగా అక్కడే కుప్పకూలింది. భర్త వెళ్లి చూసేసరికి..అప్పటికే మృతి చెందింది. ప్రభావతికి గుండెపోటు రావడంతో భర్త మనోహర్‌ 108 వాహన సిబ్బందికి ఫోన్‌ చేశారు. వెంటనే అక్కడికి చేరుకున్న సిబ్బంది మహిళను పరీక్షించి అప్పటికే మృతిచెందినట్లు నిర్థరించారు.

భార్య మరణ వార్త విని భర్త మనోహర్‌, కుమారుడు రామ్‌ లిఖిత్‌ శోకసంద్రంలో మునిగిపోయారు. ఆమె మరణాన్ని జీర్ణించుకోలేక అప్పటికే తీవ్ర వేదనకు గురైన మనోహర్.. ఈ విషయం గురించి సమచారాన్ని బంధువులకు చెబుదామని ఇంటి బయటికి వచ్చి ఉన్నట్టుండి కుప్పకూలిపోయారు. భార్య హఠాన్మరణంతో షాక్‎కు గురైన మనోహర్‎కు అరగంట వ్యవధిలోనే గుండెపోటు వచ్చింది. మనోహర్‌ను బంధువులు ఆస్పత్రికి తరలించే క్రమంలోనే ప్రాణాలు విడిచాడు.

ఆయనను పరీక్షించిన వైద్యులు గుండెపోటుతో మృతిచెందినట్లు నిర్ధారించారు. మనోహర్‌ స్థానికంగా ఎల్‌.ఐ.సి డెవలప్‌మెంట్‌ ఆఫీసర్‌గా పనిచేస్తున్నారు. డిగ్రీ పూర్తిచేసిన కుమారుడు రామ్ ఉద్యోగాన్వేషణలో ఉన్నారు. ఎంతో అన్యోన్యంగా ఉండే దంపతులు ఒక్కసారిగా మరణించడం స్థానికులను కలచివేసింది. తల్లిదండ్రులు ఇద్దరూ ఒకేసారి చనిపోవడంతో కుమారుడు ఒంటరైపోయాడు.

వీరు స్వస్థలం శ్రీకాకుళం జిల్లా ఆముదాలవలస కాగా.. 20 ఏళ్ల క్రితం ఉద్యోగ రీత్యా శృంగవరపుకోటకు వచ్చి స్థిరపడ్డారు. తన తోటి ఉద్యోగులతో ఎంతో స్నేహపూర్వకంగా ఉంటూ మనోహర్ మంచి పేరు సంపాదించుకున్నారు.