రైల్లో పురుడు పోసిన వైద్య విద్యార్థిని.. తల్లీబిడ్డ సేఫ్!

వైద్య విద్య పూర్తికాక ముందే ఓ విద్యార్థిని రెండు నిండు ప్రాణాలను నిలబెట్టి శభాష్ అనిపించుకున్నారు. రైల్లో నొప్పులతో బాధపడుతున్న గర్భిణికి పురుడు పోసి.. తల్లీబిడ్డలను సురక్షితంగా కాపాడారు. సికింద్రాబాద్ - విశాఖపట్నం దురంతో ట్రైన్‌లో మంగళవారం ఈ ఘటన చోటుచేసుకుంది. శ్రీకాకుళానికి చెందిన గర్భిణి దురంతో ట్రైన్‌లో ఎక్కారు.

అయితే, అనకాపల్లి సమీపంలోకి రాగానే ఆమెకు నొప్పులు మొదలయ్యాయి. పురిటి నొప్పులతో విలవిలలాడారు. ఈ సమయంలో అదే భోగీలో ప్రయాణిస్తున్న ఎంబీబీఎస్ విద్యార్థిని.. సదరు మహిళకు ధైర్యం చెప్పారు. నొప్పులు ఆగకపోవడంతో తోటి ప్రయాణికుల సాయం తీసుకుని రైల్లోనే పురుడు పోశారు. బిడ్డ బయటకు రావడం, తల్లి కూడా క్షేమంగా ఉండటంతో అంతా ఊపిరి పీల్చుకున్నారు. తల్లీబిడ్డ క్షేమంగా ఉండటంతో కుటుంబ సభ్యులు ఆనందం వ్యక్తం చేశారు. తల్లీబిడ్డలను కాపాడిన వైద్య విద్యార్థినిని అందరూ అభినందించారు.