సీఎం జగన్ గోల్డెన్ లెగ్.. చంద్రబాబు, లోకేశ్ ఐరన్ లెగ్స్: మంత్రి గుడివాడ

ఎవరు ఏ స్థాయిలో ఉన్నా.. దానికి కారణం వైఎస్సార్సీపీ జెండా అని ప్రతి ఒక్కరూ గుర్తు పెట్టుకోవాలని రాష్ట్ర పరిశ్రమల, ఐటీ శాఖ మంత్రి గుడివాడ అమర్నాథ్ సూచించారు. కష్టపడి పనిచేసిన ప్రతి ఒక్కరిని పార్టీ గుర్తిస్తుందన్నారు. పార్టీ స్థాపించినప్పటి నుంచి వైఎస్సార్సీపీ నాయకులు, కార్యకర్తలు ఎన్నో ఇబ్బందులను ఎదుర్కొన్నారని అన్నారు. అనకాపల్లి జిల్లా వైఎస్సార్సీపీ విస్తృత సమావేశంలో మంత్రి మాట్లాడారు.

సీఎం జగన్ మోహన్ రెడ్డి గోల్డెన్ లెగ్ అని.. అందుకే రాష్ట్రంలో కరువు పరిస్థితులు లేకుండా ఉన్నాయని మంత్రి అన్నారు. మాజీ ముఖ్యమంత్రి చంద్రబాబునాయుడు ఐరన్ లెగ్ 1, ఆయన కుమారుడు నారా లోకేశ్ ఐరన్ లెగ్ 2 అని సెటైర్లు వేశారు. రానున్న ఎన్నికల్లో ప్రతి కార్యకర్త కష్టపడి మళ్లీ వైఎస్ జగన్ మోహన్ రెడ్డిని ముఖ్యమంత్రి పీఠంలో కూర్చోబెట్టాలని పిలుపునిచ్చారు. రానున్న ఎన్నికల్లో అనకాపల్లి జిల్లాలోని 7 అసెంబ్లీ నియోజకవర్గాల్లో వైఎస్సార్సీపీ విజయకేతనం ఎగురవేస్తుందని ధీమా వ్యక్తం చేశారు.

అంతకుముందు ఉమ్మడి విశాఖ జిల్లా వైఎస్సార్సీపీ కో ఆర్డినేటర్‌ వైవీ సుబ్బారెడ్డి మాట్లాడుతూ.. జగన్ మోహన్ రెడ్డి పది సంవత్సరాలు ప్రతిపక్షంలో ఉండి పోరాటం చేశారని.. కార్యకర్తల కృషితోనే 2019లో పార్టీ అధికారంలోకి వచ్చిందన్నారు. రాష్ట్ర ఆర్థిక పరిస్థితి బాగా లేకపోయినా.. సంక్షేమ పథకాల అమలులో ఎక్కడా వెనుకడుగు వేయలేదన్నారు. గడిచిన మూడేళ్లలో విద్య, వైద్యం, వ్యవసాయం, ఉద్యోగ కల్పన, గృహాలు వంటివి పూర్తిగా అభివృద్ధి చేసి చూపించామన్నారు. ప్రభుత్వం చేసిన అభివృద్ధి కార్యక్రమాలను చూసి ఓర్వలేక ప్రతిపక్షం, పచ్చ మీడియా చేస్తున్న దుష్ప్రచారాన్ని గట్టిగా తిప్పికొట్టాలని సూచించారు. 2024 ఎన్నికల్లో విజయమే లక్ష్యంగా ప్రతి ఒక్కరూ పనిచేయాలని కోరారు.