బాలికకు టీడీపీ నేత ప్రేమ వల.. అర్ధరాత్రి బర్త్ డే విషెస్ చెప్పాలని ఇంటికి పిలిపించుకుని..

ఓ టీడీపీ నేత ప్రేమ పేరిట బాలికను నమ్మించి.. అఘాయిత్యానికి పాల్పడిన విశాఖపట్నం పీఎం పాలెం పోలీస్ స్టేషన్ పరిధిలో చోటు చేసుకుంది. అర్ధరాత్రి రాత్రి 12 గంటలకు తన బర్త్ డేకు వచ్చి విషెష్ చెప్పాలని బాలికను బెదిరించడంతో.. ఆమె రాత్రి 12 గంటలకు వెళ్లి విషెస్ చెప్పింది. ఈ సమయంలో బాలికను నమ్మించి.. అతను లోబర్చుకున్నాడు. విషయం తల్లిదండ్రులకు తెలియడంతో పోలీసులకు ఫిర్యాదు చేశారు. కుటుంబ సభ్యులు తెలిపిన వివరాల మేరకు..

విశాఖపట్నం జీవీఎంసీ ఐదో వార్డు పరిధిలోని కొమ్మాది రాజీవ్‌ గృహకల్ప 130వ బ్లాక్‌లో తెలుగుదేశం పార్టీ నాయకుడు తోట నరేంద్ర (33) నివసిస్తున్నారు. అదే కాలనీలో నివసిస్తున్న ఓ బాలిక (17)తో పరిచయం పెంచుకున్నాడు. ఆ బాలిక.. అతడిని అన్నయ్య అని పిలిచినా.. నరేంద్ర మాత్రం ప్రేమిస్తున్నా అంటూ వెంటపడేవాడు. తనను ప్రేమించకపోతే.. ఆత్మహత్య చేసుకుంటానని బెదిరించాడు. నరేంద్ర నిజంగా చనిపోతాడేమోనని భయపడిన బాలిక.. అతని ప్రేమను అంగీకరించింది.

ఆ తరువాత బాలిక ఇంట్లో ఎవరూ లేని సమయంలో వచ్చి.. బాలిక పట్ల అసభ్యంగా ప్రవర్తించేవాడు. అంతేకాకుండా అమ్మాయి కాలేజీ దగ్గరకు వెళ్లి.. బీచ్‌కు రమ్మని ఒత్తిడి చేసేవాడు. ఇదే క్రమంలో తన బర్త్ డే సందర్భంగా అర్ధరాత్రి తన ఇంటికి వచ్చి విషెస్ చెప్పాలని బెదిరించాడు. అతని బెదిరింపులకు భయపడిన బాలిక.. అర్ధరాత్రి నరేంద్ర ఇంటికి వెళ్లి పుట్టిన రోజు శుభాకాంక్షలు చెప్పింది.

అదే సమయంలో నరేంద్ర.. బాలికకు మాయమాటలు చెప్పి లోబర్చుకున్నాడు. అనంతరం ఈ వ్యవహారం గురించి బాలిక తన తల్లిదండ్రులకు చెప్పింది. పీఎం పాలెం పోలీసులకు జరిగిన ఘటనపై వారు ఫిర్యాదు చేశారు. నరేంద్రపై కేసు నమోదు చేసిన పోలీసులు అరెస్ట్ చేసి.. మెజిస్ట్రేట్ ముందు నేడు హాజరపరచనున్నారు. బాలికపై లైంగిక వేధింపులకు పాల్పడిన నరేంద్రను కఠినంగా శిక్షించాలని మహిళా సంఘాల డిమాండ్ చేస్తున్నాయి.