సముద్రంలో దూకి టీడీపీ నాయకుడు ఆత్మహత్య!

విశాఖపట్నం జిల్లా భీమిలి తెలుగు దేశం పార్టీ నాయకుడు దూకి ఆత్మహత్యకు పాల్పడటం తీవ్ర కలకలం రేపింది. మానసిక సమస్యలతో బాధపడుతున్న టీడీపీ నాయకుడు శుక్రవారం తెల్లవారుజామున సముద్రంలో దూకి ఆత్మహత్యకు పాల్పడ్డాడు. ఈ ఘటనకు సంబంధించి స్థానిక ఎస్సై జి.ప్రసాద్‌ తెలిపిన వివరాల మేరకు.. భీమిలి రొట్టెల వీధికి చెందిన దాసరి వెంకటేష్‌ (57) కిరాణా దుకాణాన్ని నిర్వహిస్తూ భీమిలి మూడో వార్డు టీడీపీ వాణిజ్య విభాగం అధ్యక్షుడిగా ఉన్నారు. ఆయనకు భార్య, ఇద్దరు పిల్లలు ఉన్నారు.


ప్రభుత్వ ఉపాధ్యాయిరాలుగా పని చేస్తున్న కుమార్తె శ్రావణికి ఇటీవల నిశ్చితార్థం కూడా జరిగింది. ఆర్థిక సమస్యలేవీ లేకపోయినప్పటికీ వెంకటేష్‌ గత కొంతకాలంగా మానసికంగా బాధపడుతున్నట్లు కుటుంబ సభ్యులు చెబుతున్నారు. ఈ క్రమంలోనే వెంకటేష్ సముద్రంలో దూసి ఆత్మహత్యకు పాల్పడ్డారు. శుక్రవారం తెల్లవారుజామున మార్నింగ్ వాక్ చేసే కొంత మంది భీమిలి సముద్ర తీరానికి కొట్టుకొచ్చిన మృతదేహాన్ని గుర్తించి కుటుంబ సభ్యులకు సమాచారం అందించారు.

మానసిక సమస్యల కారణంగానే ఆత్మహత్యకు పాల్పడినట్లు భావిస్తున్నామని వెంకటేష్ కుమారుడు గోపీనాథ్‌ పోలీసులకు ఫిర్యాదు చేశాడు. మృతదేహానికి పోస్టుమార్టం నిర్వహించి కేసు దర్యాప్తు చేస్తున్నామని పోలీసులు తెలిపారు. ఈ ఘటనపై టీడీపీ రాష్ట్ర కార్యదర్శి గంటా నూకరాజు తీవ్ర దిగ్భ్రాంతి వ్యక్తం చేశారు. ఈ మేరకు టీడీపీ ఆధ్వర్యంలో పార్టీ శ్రేణులు వెంకటేష్‌కు సంతాపం తెలిపారు.