Gitam Medical College: బాలయ్య 'అల్లుడి' మెడికల్ కాలేజ్‌ పరిసరాల్లోని ఉత్కంఠ..!

Gitam Medical College: నందమూరి బాలకృష్ణ రెండో అల్లుడు భరత్‌‌కు చెందిన గీతం మెడికల్ కాలేజ్ దగ్గరికి మరోసారి అధికారులు వెళ్లారు. గీతం మెడికల్ కాలేజ్ పరిసరాల్లో గతంలో గుర్తించిన ప్రభుత్వ భూమి చుట్టూ.. జీవీఎంసీ, రెవెన్యూ అధికారులు కంచె ఏర్పాటు చేశారు. శుక్రవారం తెల్లవారుజాము నుంచే దీనికి సంబంధించిన పనులు మొదలుపెట్టారు. దీంతో అక్కడ ఉత్కంఠ నెలకొంది. అటు వైద్యకళాశాల భవనాలను కూలుస్తారనే ప్రచారం కూడా జరిగింది. ఎండాడ, రుషికొండ (Rushikonda) వైపు వెళ్లే మార్గాల్లో బారికేడ్లు పెట్టడంతో.. ఆ ప్రచారం జరిగింది.గతంలో స్వాధీనం చేసుకున్న ప్రభుత్వ భూమిలో కంచె ఏర్పాటు చేస్తున్నట్లు.. భీమిలి (Bheemili) ఆర్డీవో స్పష్టం చేశారు. దీంతో ఉత్కంఠకు తెరపడింది. భీమిలి ఆర్డీవో భాస్కర్‌రెడ్డి, డీఆర్వో పర్యవేక్షణలో సుమారు 3 గంటలపాటు కంచె ఏర్పాటు పనులు జరిగాయి. గీతం మెడికల్ కాలేజ్ పరిసరాల్లో ప్రభుత్వ భూమి బోర్డులు కూడా ఏర్పాటు చేశారు. కంచె ఏర్పాటు చేస్తున్న సమయంలో.. గీతం వైద్య కళాశాల పరిసరాల్లో భారీగా పోలీసులను మోహరించారు. మీడియాను కూడా లోపలికి అనుమతించలేదు. ఇదే సమయంలో కొంతమంది టీడీపీ (Telugu Desam Party) నేతలను గృహ నిర్బంధం చేయడం చర్చనీయాంశం అయ్యింది.

అయితే.. గీతం మెడికల్ కాలేజ్‌ (Gitam Medical College)ను ఆనుకుని ఉన్న 14 ఎకరాల ప్రభుత్వ భూమిని గతంలోనే స్వాధీనం చేసుకున్నామని.. ఇప్పుడు కంచె ఏర్పాటు చేశామని అధికారులు వెల్లడించారు. రుషికొండలోని సర్వే నంబర్‌ 37, 38లోని స్థలాన్ని అప్పట్లో స్వాధీనం చేసుకున్నామని.. గతంలోనే ఈ స్థలాన్ని మార్క్‌ చేశామని.. తాజాగా 5.25 ఎకరాల్లో కంచె వేశామని అధికారులు వివరించారు. మిగిలిన స్థలానికి ప్రభుత్వ భూములే సరిహద్దులుగా ఉండటంతో కంచె ఏర్పాటు చేయలేదని చెప్పారు. ఈ స్థలంలో ఎలాంటి నిర్మాణాలు లేవని వెల్లడించారు.