Vizag: అరకు మార్గంలో పట్టాలు తప్పిన రైలు

అరకు లోయ మార్గంలో ప్యాసింజర్ రైలుకు పెను ప్రమాదం తప్పింది. విశాఖపట్నం - కిరండల్ ప్యాసింజర్ రైలు పట్టాలు తప్పింది. మంగళవారం (జనవరి 17) ఉదయం కాశీపట్నం సమీపంలోని శివలింగపురం వద్ద పట్టాలు తప్పడంతో ఒక బోగీ పక్కకు ఒరిగింది. లోకో పైలట్ చాకచక్యంగా వ్యవహరించి రైలును నిలిపివేయడంతో పెను ప్రమాదం తప్పింది. దీంతో ప్రయాణికులు ప్రాణాపాయం నుంచి బయటపడ్డారు.

ఘటనకు సంబంధించిన సమాచారం అందగానే.. విశాఖ రైల్వే స్టేషన్ నుంచి మెడికల్ ఎమర్జెన్సీ సిబ్బంది ఘటనా స్థలానికి బయల్దేరి వెళ్లారు. రైల్వే సిబ్బంది మరమ్మతులు చేపట్టారు. ప్రయాణికులను మరో బోగీలో ఎక్కించి గమ్యస్థానాలకు పంపించారు.

ఎవ్వరికీ ఎలాంటి ప్రమాదం చోటు చేసుకోలేదని రైల్వే అధికారులు తెలిపారు. కొండ ప్రాంతాల్లో అతి శీతల ఉష్ణోగ్రతల సమయాల్లో కొన్నిసార్లు ఇలాంటి ఘటనలు జరిగే ముప్పు ఉందని వివరించారు.