భారీ ప్రమాదం: అగ్నికి ఆహుతైన 25 ఎలక్ట్రిక్ బైక్‌లు!

పార్వతీపురం మన్యం జిల్లా పాలకొండ పట్టణంలోని ఓ బైక్‌ షోరూంలో సోమవారం భారీ అగ్నిప్రమాదం చోటుచేసుకుంది. విద్యుత్‌ వాహనాలు (ఎలక్ట్రిక్ వెహికల్స్) విక్రయించే షోరూంలో ఈ ఘటన చోటుచేసుకుంది. ఈ ప్రమాదంలో విక్రయానికి సిద్ధంగా ఉంచిన 25 ద్విచక్ర వాహనాలు దగ్ధమయ్యాయి.

షోరూం నుంచి పొగలు రావడాన్ని గమనించిన స్థానికులు.. వెంటనే అగ్నిమాపక సిబ్బందికి సమాచారం అందించారు. ఘటనాస్థలానికి అగ్నిమాపక సిబ్బంది చేరుకుని మంటలను అదుపులోకి తీసుకొచ్చారు. ఈ ప్రమాదంలో దుకాణంలో ఉన్న మొత్తం 25 వాహనాలతో పాటు బ్యాటరీలు కూడా అగ్నికి ఆహుతయ్యాయి.

షార్ట్‌సర్క్యూట్‌ వల్ల ఈ ప్రమాదం జరిగి ఉంటుందని అధికారులు అనుమానం వ్యక్తం చేస్తున్నారు. ఈ ప్రమాదంలో సుమారు రూ. 25 లక్షలు ఆస్తి నష్టం జరిగినట్లు షోరూం యజమానులు తెలిపారు. అయితే, ప్రమాద సమయంలో షోరూంలో ఎవరూ లేకపోవడంతో పెను ప్రమాదం తప్పినట్లయింది.