టీడీపీ నాకు రూ.30కోట్లు ఆఫర్ చేసింది.. ఏపీ డిప్యూటీ సీఎం ఆసక్తికర వ్యాఖ్యలు

ఏపీ డిప్యూటీ సీఎం పీడిక రాజన్నదొర విజయనగరంలో జిల్లా స్థాయి వైఎస్సార్‌సీపీ ప్లీనరీలో ఆసక్తికర వ్యాఖ్యలు చేశారు. టీడీపీ అధికారంలో ఉన్నప్పుడు.. పార్టీలో చేరడానికి బేరం పెట్టారని ఆరోపించారు. తన పిల్లల చదువుతోపాటు రూ.30 కోట్లు, మంత్రి పదవి, అమరావతిలో ఇల్లు ఇస్తామన్నారని చెప్పుకొచ్చారు. కానీ తాను మాత్రం అధినేత జగన్‌పై ఉన్న నమ్మకం, అభిమానంతో పార్టీ మారలేదన్నారు. తాను టీడీపీలోకి వెళ్లకపోవడం వల్లే ఇప్పుడు మంచి స్థాయిలో ఉన్నానని.. పదవిలో కొనసాగుతున్నాను అన్నారు.తనకు మొదటిసారి మంత్రి పదవి రాకపోయినా సరే అసంతృప్తి వ్యక్తం చేయలేదని గుర్తు చేశారు. ఇదే జిల్లాకు చెందిన పుష్పశ్రీవాణికి అవకాశం ఇచ్చినా ఒక్కమాట కూడా అనలేదని.. పత్రికలు, టీవీల్లో వస్తున్న వార్తల్లో ఏది నిజమో తెలుసుకుంటే మంచిదని హితవు పలికారు. గత టీడీపీ ప్రభుత్వం డ్వాక్రా రుణాల మాఫీ పేరుతో రూ.వేల కోట్లు దోచుకున్నారని ఆరోపించారు. వైఎస్సార్‌సీపీ అధికారంలోకి వచ్చాక రూ.27వేల కోట్లు మాఫీ చేశామన్నారు.