కళాశాల బీరువాలో వింత శబ్దాలు.. ఓపెన్ చేసి చూస్తే.. బాబోయ్, ఊహించని షాక్.!

అదొక ప్రభుత్వ జూనియర్ కళాశాల. ఎప్పటి మాదిరిగానే టీచర్, నాన్ టీచింగ్ సిబ్బంది ఎవరి పనుల్లో వారు నిమగ్నమయ్యారు. ఇంతలో ప్రిన్సిపాల్ ఓ రికార్డ్ తీసుకురావాలని ప్యూన్‌కి చెప్పడంతో అతడు బీరువా వద్దకు వెళ్లాడు. చాలా పాత కాలం నాటి ఆ బీరువాలోనే ఎన్నో ఏళ్లుగా రికార్డులు భద్రపరుస్తున్నారు. కరోనా వైరస్ మహమ్మారి కారణంగా ఇటీవలి కాలంలో కాలేజీలు తెరవకపోవడంతో.. ఆఫీస్ వస్తువులన్నీ మరింతగా పాడుబడ్డాయి.

ఈ క్రమంలోనే రికార్డుల కోసం బీరువా వద్దకు ప్యూన్ వెళ్లారు. అయితే, బీరువా లోపలి నుంచి ఏదో వింత శబ్దాలు వినిపించాయి. ఏవో పురుగులు, బల్లులుగా భావించి అతడు పెద్దగా పట్టించుకోలేదు. బీరువాను ఓపెన్ చేసి చూడగా.. ఒక్కసారి షాక్‌కు గురయ్యాడు. లోపల కనిపించిన దృశ్యాన్ని చూసి గడగడా వణికిపోయారు. ఎదురుగా బుసులు కొడుతున్న త్రాచుపామును.. బెంబేలెత్తిపోయి భయంతో అక్కడ నుంచి పరుగులు తీశాడు.

అసలేం జరిగిందంటే.. ఆంధ్రప్రదేశ్‌లోని విజయనగరం జిల్లా గజపతినగరం ప్రభుత్వ జూనియర్ కాలేజీలో ప్రిన్సిపాల్ కార్యాలయంలో బీరువాలో త్రాచుపాము తీవ్ర కలకలం రేపింది. కాలేజీ కార్యాలయంలోని రికార్డ్స్ భద్రపరిచే బీరువాలో కార్యాలయ సిబ్బంది త్రాచుపామును గుర్తించారు. దీంతో భయంతో బెంబేలెత్తిపోయి బయటికి పరుగులు తీశారు. వెంటనే ఈ సమాచారాన్ని కార్యాలయ సిబ్బంది స్నేక్ క్యాచర్‌కు అందించారు. వెనువెంటనే అతడు, అక్కడికి చేరుకున్నాడు. ఎంతో చాకచక్యంగా స్నేక్ క్యాచర్ పామునుపట్టుకోవడంతో కాలేజీ సిబ్బంది ఊపిరి పీల్చుకున్నారు.