ఘనంగా ఆదివాసీ దినోత్సవం.. ప్రత్యేక ఆకర్షణగా నిలిచిన ఐఏఎస్ నవ్య

ఆంధ్రప్రదేశ్‌లో ప్రపంచ ఆదివాసీ దినోత్సవ వేడుకలు బుధవారం అంగరంగ వైభవంగా జరిగాయి. రాష్ట్రంలోని పార్వతీపురం మన్యం జిల్లాలో జరిగిన ఆదివాసీ దినోత్సవ వేడుకల్లో కలెక్టర్ నిశాంత్ కుమార్, ఎమ్మెల్యే విశ్వసరాయి కళావతి, ఐటీడీఏ పీవో బి.నవ్య, పలువురు ఐఏఎస్‌లు, అధికారులు, ప్రజా ప్రతినిధులు పాల్గొని ఘనంగా నిర్వహించారు.

ఈ ఉత్సవాల్లో ఎమ్మెల్యేతో పాటు కలెక్టర్, ఐటీడీఏ పీవోలు గిరిజన సంప్రదాయ థింసా నృత్యంతో అందరినీ అలరించారు. అయితే, ఈ వేడుకల్లో ఐటీడీఏ పీవో బి.నవ్య ప్రత్యేక ఆకర్షణగా నిలిచారు. ఐఏఎస్ అధికారి అయిన నవ్య గిరిజన సాంప్రదాయ నృత్యం చేశారు. ఆదివాసీలతో సరదాగా కలిసిపోయి, కుటుంబ సభ్యురాలిలా వారికి చేరువయ్యే ప్రయత్నం చేశారు.

ఉత్సవాల్లో ఎంతో యాక్టివ్‌గా పాల్గొన్న ఐటీడీఏ పీవో నవ్యకు గిరిజనులు తమ సంప్రదాయ కానుకలు అందజేసి ప్రశంసలు కురిపించారు. అధికారులు ప్రజల సొంత మనిషిలా కలిసిపోతే.. మరిన్ని సమస్యలు తెలుసుకొని వారి కష్టాలను తీర్చే అవకాశం వస్తుందని ఈ సందర్భంగా ఐఏఎస్‌ నవ్య అభిప్రాయపడ్డారు.