చీపురుపల్లి సమీపంలో రోడ్డు ప్రమాదం.. కాన్వాయ్ ఆపి బాధితులకు చంద్రబాబు సాయం

రోడ్డు ప్రమాద బాధితుల పట్ల మాజీ ముఖ్యమంత్రి చంద్రబాబునాయుడు ఉదారతను చాటుకున్నారు. తీవ్రంగా గాయపడిన ఇద్దర్ని తన కాన్వాయ్‌లోని అంబులెన్స్‌లో ఆస్పత్రికి తరలించే ఏర్పాట్లు చేశారు. విజయనగరం జిల్లా చీపురపల్లి సమీపంలో శుక్రవారం రాత్రి ఈ ఘటన చోటుచేసుకుంది. ఉత్తరాంధ్ర పర్యటనలో ఉన్న చంద్రబాబు నాయుడు.. చీపురుపల్లిలో రోడ్ షో ముగించుకుని విశాఖకు వెళ్తున్నారు. ఈ సమయంలో జరిగిన రోడ్డు ప్రమాదంలో ఇద్దరు వ్యక్తులు తీవ్రంగా గాయపడ్డారు. ప్రమాదాన్ని గమనించి మాజీ ముఖ్యమంత్రి తన కాన్వాయ్‌ను ఆపించి కిందకు దిగారు. బాధితుల పరిస్థితిని గమనించిన చంద్రబాబు వారిని అంబులెన్స్‌లో తరలించే ఏర్పాటు చేశారు. తన కాన్వాయ్‌లోని అంబులెన్స్‌లోనే వారిని ఆసుపత్రికి పంపించారు. స్థానిక నేతలతో మాట్లాడి బాధితులకు మెరుగైన వైద్యం అందేలా చూడాలని చంద్రబాబు సూచించారు.

కాగా, అంతకు ముందు విద్యా శాఖ మంత్రి బొత్స సత్యనారాయణ సొంత నియోజకవర్గం చీపురపల్లిలో జరిగిన రోడ్ షోలో మంత్రిపై చంద్రబాబు నిప్పులు చెరిగారు. చరిత్రలో ఎప్పుడూ లేనివిధంగా పదో తరగతి పరీక్షల ఫలితాలు తగ్గాయని, దీనికి ఆంగ్ల మాధ్యమమే కారణమని ధ్వజమెత్తారు. ఇంగ్లిష్‌ పేరుతో విద్యా రంగాన్ని నాశనం చేస్తున్నారని, నాడు-నేడు పేరుతో పాఠశాలలకు రంగులు వేశారు ఆరోపించారు. పరిపాలన ఎటు వెళ్తోంది? లిక్కర్‌ డాన్‌గా పేరొందిన బొత్స సత్యనారాయణను విద్యా మంత్రిని చేశారని ఘాటు వ్యాఖ్యలు చేశారు.

తిరోగమన విధానాలతో విద్యారంగాన్ని భ్రష్టు పట్టిస్తున్నారని, పదో తరగతి ఫలితాలు తగ్గేందుకు విద్యార్థుల తల్లిదండ్రులదే బాధ్యతని బొత్స మాట్లాడడం ఎంతవరకు సబబు? అని.. తల్లిదండ్రులుగా మీరే చెప్పండని బాబు ప్రశ్నించారు. బొత్స అవినీతి అడ్డా ఇదని, ప్రజల ఉత్సాహం చూస్తుంటే ఆయనపై ఉన్న వ్యతిరేకత అర్థమవుతోందన్నారు. బొత్సా.. ఇక్కడకు వచ్చిన జనాన్ని చూడు.. ఈ జనాన్ని చూసి జగన్‌రెడ్డికి, బొత్సకు నిద్రపట్టదు. ఆయనకు జిల్లాను జాగీరుగా రాసిచ్చారా? జనాల్లో మార్పు మొదలైంది. రాజకీయంగా బొత్స కుటుంబ పాలనను భూస్థాపితం చేయాలని పిలుపునిచ్చారు.