అమ్మవారు కలలో చెప్పారట.. రూ. లక్షలు ఖర్చుపెట్టి తవ్వకాలు.. చూసేందుకు ఎగబడుతున్న జనాలు!

విజయనగరం జిల్లా చీపురుపల్లి నియోజకవర్గంలో ఓ మహిళ.. తన కలలోకి అమ్మవారు వచ్చి చెప్పారంటూ లక్షల రూపాయిలు ఖర్చుపెట్టి తవ్వకాలు చేస్తున్నారు. శ్రీకాకుళం జిల్లా వత్సలవలసలో వెలసిన రాజరాజేశ్వరి (రాజులమ్మ) అమ్మవారు తనకు కలలో కనిపించి.. ‘‘మీ భూముల్లో నేను విగ్రహాల రూపంలో ఉన్నాను.. తవ్వకాలు జరిపితే విగ్రహాలు లభ్యమవుతాయి’’ అని చెప్పిందని లక్ష్మి అనే మహిళ అంటున్నారు. అమ్మవారి చెప్పిన దాని ప్రకారం.. విగ్రహాలు కనిపెట్టేందుకు తవ్వకాలకు పూనుకున్నట్లు వెల్లడించారు.

అసలేం జరిగిందంటే.. చీపురుపల్లి నియోజకవర్గం, పుర్రెవలస గ్రామంలో కంది లక్ష్మి కుటుంబంతో కలిసి జీవిస్తున్నారు. అయితే, శ్రీకాకుళం జిల్లా వత్సలవలసలో వెలసిన రాజులమ్మ తల్లి గత రెండు సంవత్సరాల నుంచి తనకు కలలోకి వస్తోందని.. తమ భూమిలో విగ్రహల రూపంలో వెలిసి ఉన్నానని చెప్పినట్లు సదరు మహిళ చెబుతున్నారు. అక్కడ తవ్వకాలు చేపట్టాలని అమ్మవారు కోరినట్లు మహిళ పేర్కొన్నారు. దీంతో, పుర్రెవలస గ్రామానికి సమీపంలోని చీపురుపల్లి– సుభద్రాపురం ప్రధాన రహదారి పక్కన.. లక్ష్మి, తన కుమారుడు రామకృష్ణతో కలిసి తవ్వకాలు ప్రారంభించారు. అయితే, కొంత వరకు తవ్విన తర్వాత తల్లి, కుమారుడికి కష్టం అనిపించి ఆపేశారు.

అయితే, అమ్మవారు మళ్లీ కలలో కనిపించి మరో 50 అడుగుల లోతు తవ్వితే విగ్రహాలు కనిపిస్తాయని, ఎట్టిపరిస్థితుల్లోనూ ఆపవద్దని చెప్పడంతో మళ్లీ తవ్వకాలు ప్రారంభించినట్లు లక్ష్మితో పాటు కుటుంబ సభ్యులు చెబుతున్నారు. ఇక, అప్పటి నుంచి గత 25 రోజులుగా 25 మంది కూలీలు తవ్వుతున్నారు. ఇప్పటి వరకు సుమారు రూ. 1.50 లక్షల వరకు ఖర్చు అయిందని లక్ష్మి తెలిపారు. విగ్రహా లు లభిస్తే ఇళ్లు, భూమి అమ్మేసైనా సరే గుడి కడతామని చెబుతున్నారు. తవ్వకాలు చూసేందుకు ప్రతి రోజూ జనాలు తండోపతండాలుగా తరలివస్తున్నారు.