Lunar Eclipse ఊల్ఫ్ మూన్ చంద్రగ్రహణం.. అలా పిలవడం వెనుక కారణం ఇదే?

జనవరి 10న భారత కాలమానం ప్రకారం శుక్రవారం రాత్రి 10.37 గంటలకు చంద్రగ్రహణం ప్రారంభమవుతుంది. అర్ధరాత్రి 12.32 గంటలకు సంపూర్ణ చంద్రగ్రహణంగా మారి దాదాపు గంట పాటు కొనసాగుతుంది. ఈ గ్రహణం భారత్‌తోపాటు ఆసియా, ఐరోపా, ఆఫ్రికా, ఆస్ట్రేలియాలో కనువిందు చేయనుంది. జనవరిలో ఏర్పడే ఈ చంద్ర గ్రహణాన్ని ఇంగ్లిష్‌లో ఊల్ఫ్ మూన్ లూనార్ ఎక్లిప్స్ అని పిలుస్తున్నారు. ఇందులో తోడేలు పదం ఎందుకు చేరిందన్నది ఆసక్తికరం. అయితే, పురాతన ఇతిహాసాలు, పురాణాల ప్రకారం.. జనవరి నెలలో పౌర్ణమి రోజున తోడేళ్లు అరుస్తాయని, అందువల్ల దీనికి ‘తోడేలు గ్రహణం’ అనే పేరు వచ్చింది. జనవరిలో వచ్చే పౌర్ణమి రోజున చంద్రుడు తోడేలు రూపంలో ఉంటే అత్యంత ప్రమాదకరమైన పరిగణించి, కుక్కలు మొరుగుతాయని పాశ్చత్య సంస్కృతి బలంగా నమ్ముతుంది.

అంటార్కిటికాలో అత్యంత శీతలమైన పరిస్థితులు ఉంటాయి. ఇదే సమయంలో అమెరికా తదితర దేశాల్లో చలి ఎక్కువగా ఉంటుంది. మంచు విపరీతంగా కురుస్తూ ఉంటుంది. అందువల్ల జంతువులకు ఆహారం దొరకదు. ఇక, తోడేళ్లు ఆహారం కోసం గ్రామాల శివార్లలోకి వచ్చి గట్టిగా అరుస్తాయి. అందువల్ల జనవరిలో కనిపించే చంద్రుణ్ని ఊల్ఫ్ మూన్ అని పిలుస్తారు. అందువల్ల ఇప్పుడు వచ్చే చంద్ర గ్రహణాన్ని తోడేలు చంద్రగ్రహణం అంటున్నారు.

చంద్ర గ్రహణం పౌర్ణమి రోజు రాత్రి వేళల్లో సంభవిస్తుంది. అయితే అన్ని పౌర్ణమి రోజులలో సంభవించదు. చంద్రుని కక్ష్య, భూ కక్ష్య మధ్య 5.9° కోణీయ దూరం వ్యత్యాసం ఉండటమే దీనికి కారణం. సూర్య రశ్మి భూవాతావరణంలోకి ప్రవేశించిన తరువాత వర్ణాలు విడిపోతాయి. వాటిలో అధిక తరంగదైర్ఘ్యం ఉండే ఎరుపు, నారింజ రంగులు మాత్రం ఎక్కువ దూరం ప్రయాణిస్తాయి. చంద్రగ్రహణం రోజున భూ ఛాయలోకి ప్రవేశించిన సూర్యకిరణాలలో చంద్రుడిపైకి ఈ రెండు రంగులే ఎక్కువగా ప్రసరిస్తాయి. అందుకే ఆ రోజు చందమామ సాధారణ రోజుల కంటే ఎర్రగా కనిపిస్తుంది. అందుకే దీన్ని బ్లడ్ మూన్ అంటారు.ఈ సమయంలో చందమామ 7 శాతం పెద్దగా, 15 శాతం కాంతివంతంగా కనిపిస్తుంది.