ఐపీఎల్ ట్రోఫీ ఆ జట్టుదే...జ్యోతిషుల అంచనా!

ఏప్రిల్ 5న మొదలయ్యే ఐపీఎల్ సంబరం 47 రోజుల పాటు కొనసాగుతుంది. ఈ వేసవిలో క్రికెట్ అభిమానులు పండగ చేసుకోనున్నారు. ప్రపంచంలోని గొప్ప గొప్ప బ్యాట్స్‌మెన్లు, బౌలర్లు తమ విన్యాసాలతో క్రికెట్ ప్రేమికులను ఊర్రూతలూగించనున్నారు. టీ20 మ్యాచ్‌ల్లో చివరి బంతి వరకూ ఫలితం తేలని సందర్భాలెన్నో. ఇక ఐపీఎల్ విజేతగా ఎవరు నిలుస్తారని ముందుగానే అంచనా వేయడం కష్టం. కానీ ఈ సీజన్‌లో విజేతగా నిలిచే జట్టు ఏదనే విషయమై జ్యోతిష్కులు ఇప్పటికే అంచనా వేశారు.

ఐపీఎల్ పదో సీజన్‌లో ఎవరు రాణిస్తారు, ఎవరు నిరాశ పరుస్తారో కూడా జ్యోతిషులు పేర్కొంటున్నారు. యూసఫ్ పఠాన్, షకిబుల్ హసన్, సునీల్ నరైన్, మిచెల్ జాన్సన్, లసింత్ మలింగ, హర్బజన్ సింగ్ లాంటి ఆటగాళ్లకు బ్యాడ్ టైమ్ నడుస్తోంది. వీరి టైమ్ దాదాపుగా ముగిసిపోయినట్లే అని చెబుతున్నారు. అలాగే కోల్‌కతా నైట్ రైడర్స్‌ కోచ్‌ జాక్వెస్ కలిస్, ముంబై ఇండియన్స్ కోచ్ మహేల జయవర్ధనే‌లు తమ జట్లకు విజయాలను అందించలేరట.

విరాట్ కోహ్లీ జాతకం బలంగా ఉందని జ్యోతిషులు పేర్కొంటున్నారు. కోహ్లీ తర్వాతి సురేశ్ రైనా జాతకంలో గ్రహాలు ఉచ్ఛస్థితిలో ఉన్నాయని అంటున్నారు. క్రిస్ గేల్, సర్ఫరాజ్ ఖాన్‌లు తమ ఆటతీరుతో మ్యాచ్ స్వరూపాన్నే మార్చేయగలరట. ఈ సారి ఢిల్లీ డేర్‌డెవిల్స్ కప్పును ఎగరేసుకుపోతుందట. ఎందుకంటే ఆ జట్టు కెప్టెన్ జహీర్ ఖాన్, కోచ్ పాడ్డీ ఆప్టన్, పర్యవేక్షకుడు రాహుల్ ద్రావిడ్‌ల గ్రహస్థితి బలంగా ఉందట. అలాగే రాయల్ ఛాలెంజర్స్ బెంగళూరు, గుజరాత్‌ కూడా విజయవకాశాలు మెరుగ్గా ఉన్నాయని జ్యోతిషులు తెలియజేస్తున్నారు.

ముంబై, కోల్‌కతా, పంజాబ్ జట్లకు ట్రోఫీ గెలుచుకునే అవకాశాలు తక్కువగా ఉన్నాయని, కానీ ఈ జట్లు తమ కెప్టెన్‌ను మార్చితే అదృష్టం తలుపుతట్టే అవకాశం ఉందని చెబుతున్నారు. మరోవైపు బెట్టింగులు ఊపందుకున్నాయి. రాయల్ ఛాలెంజర్స్ బెంగళూరు జట్టుపై బెట్టింగ్ రాయుళ్లు ఎక్కువ అంచనాలు పెట్టుకున్నారు. వీళ్లంతా ఆర్సీబీ పదో సీజన్ విజేతగా నిలుస్తుందని భావిస్తున్నారు.