టాటా గ్రావిటస్..
టాటా మోటార్స్ నుంచి రానున్న ఈ 7-సీటర్ ఎస్ యూవీని సరికొత్తగా డిజైన్ చేశారు. ఎల్ఈడీ డీఆర్ఎల్, హెడ్ లైట్లు, మూడో వరుసలో కూర్చున్న ప్రయాణికులకూ హెడ్ రూమ్ సదుపాయం లాంటి ఫీచర్లు ఉన్నాయి. అంతేకాకుండా ఇది టాటా హ్యారియర్ తో పోలిస్తే 80 ఎంఎం ఎత్తు, 63 ఎంఎం పొడవు ఎక్కువగా ఉంది. టాటా గ్రావిటస్ 2.0 లీటర్ టర్బో డీజిన్ ఇంజిన్ ను కలిగి ఉండి మ్యానువల్, ఆటోమేటిక్ ట్రాన్స్ మిషన్ వ్యవస్థతో పనిచేస్తుంది. ఈ ఏడాది ఏప్రిల్-జూన్ మధ్యలో ఈ వాహనం భారత విపణిలోకి రానుంది. దీని ధరను టాటా మోటార్స్ అధికారికంగా ప్రకటించలేదు. అయితే 18 లక్షల రూపాయల రేంజ్ లో ఉండే అవకాశమున్నట్లు ఆటో విశ్లేషకుల అంచనా. రన్నింగ్ బోర్డ్, రూఫ్ రెయిల్స్, అల్లాయ్ వీల్స్ లాంటి ప్రత్యేకతలు ఇందులో ఉన్నాయి. అంతేకాకుడా గ్రావిటస్ బాక్సీ డిజైన్ లో రూపొందించిన ఈ కారు సంప్రదాయపు ఎస్ యూవీ కాన్సెప్టుగా దర్శనమివ్వనుంది.
ఎంజీ హెక్టార్ ప్లస్..
ప్రముఖ వాహనం సంస్థ ఎంజీ హెక్టార్ ఇండియా.. తన సరికొత్త ఎంజీ హెక్టార్ ప్లస్ ఎస్ యూవీని ఈ ఏడాది చివర్లోనే భారత మార్కెట్లో లాంచ్ చేయనుంది. ఈ కారు ప్రారంభ ధర వచ్చేసి రూ.14 లక్షల నుంచి 20 లక్షల రూపాయల మధ్య ఉండే అవకాశముంది. 2020 ఆటో ఎక్స్ పోలో ఈ కారు ప్రొడక్షన్ వర్షన్ ను తొలిసారిగా ప్రదర్శించారు. చూసేందుకు స్టాండర్డ్ హెక్టార్ మోడల్ గానే కనిపిస్తున్న ఈ ఎస్ యూవీ కొన్ని డిజైన్ ఎలిమింట్లను కొత్తగా అమర్చారు. ఎల్ఈడీ డే టైమ్ రన్నింగ్ లైట్లు, మెయిన్ హెడ్ ల్యాంపు క్లస్టర్, ముందుభాగంలో ఉన్న లోవర్ ఫ్రంట్ బంపర్ నూ పునరుద్ధరించారు. ముందుభాగంలో ఉన్న రేడియేటర్ గ్రిల్ పెద్దగా ఉండి బ్లాక్ డ్ అవుట్ థీమ్ తో ఆకట్టుకుంటోంది. వెనుక భాగంలోనూ ఇదే విధంగా ఉంది. టెయిల్ ల్యాంపులను తొలగించి కొత్తగా టెయిల్ ల్యాంపు క్లస్టర్ ను అమర్చారు. ఈ సరికొత్త 7-సీటర్ లో క్యాబిన్ ను పూర్తిగా రీడిజైన్ చేశారు. చూసేందుకు స్టాండర్డ్ హెక్టార్ క్యాబిన్ మాదిరిగానే కనిపిస్తుంది.
ఎంజీ గ్లోస్టర్..
భారత మార్కెట్లో ఎమ్ జీ గ్లోస్టర్ కు పోటీగా ఫోర్డ్ ఎండీవర్, టొయోటా ఫార్చునర్ లాంటి కార్లు ఉన్నాయి. అయితే వీటితో పోలిస్తే గ్లోస్టర్ పరిమాణం కొంచెం పెద్దగా ఉంది. పొడవు, వెడల్పు, ఎత్తు ఎందులో చూసుకున్న గ్లోస్టర్ ఘోస్ట్ లా ఉంది. ఈ కారు ముందుభాగంల పెద్ద గ్రిల్ వాటిపై పొందికగా అమర్చిన ఎమ్ జీ బ్యాడ్జీతో ఆకట్టుకుంటోంది. వాహన అంతర్భాగం రిచ్ లుక్ తో అదరగొడుతుంది. లెదర్ డ్యాష్ బోర్డు, పానోరామిక్ సన్ రూఫ్, ఫ్లోటింగ్ టచ్ స్క్రీన్, డిజిటల్ క్లస్టర్ లాంటి ప్రత్యేకతలు ఇందులో ఉన్నాయి. ఈ కారు బీఎస్6 ఫార్మాట్లో నిర్మితమై 2.0లీటర్ డీజిల్, పెట్రోల్ రెండు ఇంజిన్లతోనూ పనిచేస్తుంది. డీజిల్ ఇంజిన్ అయితే 215పీఎస్ పవర్, 480ఎన్ఎమ్ టార్క్ ను ఉత్పత్తి చేస్తుంది. ఇది 8-స్పీడ్ ఆటోమేటిక్ ట్రాన్స్ మిషన్ ను కలిగిఉంది. పెట్రోల్ ఇంజిన్ 217పీఎస్, 315ఎన్ఎమ్ టార్క్ ను ఉత్పత్తి చేస్తుంది. ఇది 6-స్పీడ్ మ్యానువల్ ట్రాన్స్ మిషన్ ను కలిగి ఉంది. అంతేకాకుండా ఏడుగురు సౌకర్యవంతంగా కూర్చొని ఇందులో ప్రయాణించగలరు.