ధర..
ఎక్స్ షోరూంలో వోక్స్ వాగెన్ టిగ్వాన్ ప్రారంభ ధర 33.12 లక్షల రూపాయలుగా సంస్థ నిర్దేశించింది. అంతేకాకుండా ఇందులో ఏడుగురు వరకు సౌకర్యవంతంగా కూర్చొని ప్రయాణించే సౌలభ్యముంది. అదే టిగ్వాన్ వాహనం ప్రారంభ ధర 28.14 లక్షల రూపాయలుగా ఉంది. రెండు వేరియంట్లలో లభ్యమవుతున్న ఈ కారు ధరలో వేరియంట్ల వారీగా వ్యత్యాసముంది. కంఫర్ట్ లైన్, హైలైన్ అనే వేరియంట్లలో ఈ కారును సొంతం చేసుకోవచ్చు. హైలైన్ వేరియంట్ ధర 31.53 లక్షల రూపాయలుగా సంస్థ నిర్దేశించింది.
ఇంజిన్ లో తేడా..
వోక్స్ వాగెన్ టిగ్వాన్ ఆల్ స్పేస్ వాహనం బీఎస్6 కాలుష్య నియంత్రణ ప్రమాణాలకు అనుగుణంగా నిర్మితమైంది. అంతేకాకుండా ఇందులో 2.0 లీటర్ టీఎస్ఐ పెట్రోల్ ఇంజిన్ ఉంది. ఇది 190 పీఎస్ పవర్, 320 ఎన్ఎం టార్క్ ను ఉత్పత్తి చేస్తుంది. అంతేకాకుండా 7-స్పీడ్ డీఎస్ జీ ఆటోమేటిక్ ట్రాన్స్ మిషన్ వ్యవస్థతో ఇది పనిచేస్తుంది. అయితే టిగ్వాన్ ఆల్ స్పేస్ డీజిల్ ఇంజిన్ ఆప్షన్ లేదు. కేవలం పెట్రోల్ ఇంజిన్ తోనే పనిచేసే సౌలభ్యాన్ని కల్పించింది సంస్థ. వోక్స్ వాగెన్ టిగ్వాన్ మోడల్.. బీఎస్4 ఫార్మాట్లో రూపొందించగా.. ఇందులో 2.0 లీటర్ టీడీఐ డీజిల్ ఇంజిన్ ఉంది. ఇది 143 పీఎస్ పవర్, 340 ఎన్ఎం టార్క్ ను కలిగి ఉంది. అంతేకాకుండా 7-స్పీడ్ డీఎస్ జీ ఆటోమేటిక్ ట్రాన్స్ మిషన్ వ్యవస్థతోనే ఈ మోడల్ కూడా పనిచేస్తుంది. అయితే టిగ్వాన్ లో గ్యాసోలిన్ ఆప్షన్ ఇందులో లేదు.
డిజైన్..
వోక్స్ వాగెన్ టిగ్వాన్ ఆల్ స్పేస్ వాహనం.. 18-అంగుళాల అల్లాయ్ వీల్స్ ను కలిగి ఉంది. అయితే టిగ్వాన్ కంఫర్ట్ లైన్ వేరియంట్ 17-అంగుళాల వీల్స్ మాత్రమే కలిగి ఉండగా.. హైలైన్ వేరియంట్లో 18-అంగుళాల అల్లాయ్ వీల్స్ ఉన్నాయి. టిగ్వాన్ ఆల్ స్పేస్ వాహనంలో 7 గురు సరిపడా ప్రయాణించే సౌలభ్యముండగా.. టిగ్వాన్ లో మాత్రం 5 గురే కూర్చోవచ్చు. అంతేకాకుండా టిగ్వాన్ ఆల్ స్పేస్ బరువును కూడా పెంచారు. ఈ వాహనం 2410 కేజీలు ఉండగా.. టిగ్వాన్ మాత్రం 2250 కేజీలే ఉంది. అయితే టిగ్వాన్ ఆల్ స్పేస్ టిగ్వాన్ కెర్బ్ వెయిట్ 1780 కేజీలు కాగా.. టిగ్వాన్ వాహనమైతే 1720 కేజీలు ఉంది. పరిమాణంలోనూ టిగ్వాన్ కంటే ఈ సరికొత్త వాహనం పొడవు, ఎత్తు ఎక్కువ. వీల్ బేస్ కూడా అధికం. వెడల్పు మాత్రం రెండింటిలో ఒకేలా ఉంది. టిగ్వాన్ ఆల్ స్పేస్ 4821 ఎంఎం ఉండగా.. వెడల్పు 1839 ఎంఎం, ఎత్తు 1674 ఎంఎం ఉంది. వీల్ బేస్ కూడా 2787 ఎంఎం ఉంది. అదే టిగ్వాన్ వాహనమైతే 4486 ఎంఎం పొడవు, 1839 ఎంఎం వెడల్పు, 1672 ఎంఎం ఎత్తు, 2677 వీల్ బేస్ తో ఆల్ స్పేస్ కంటే తక్కువ పరిమాణంలో ఉంది.
ఫీచర్లు..
వోక్స్ వాగెన్ టిగ్వాన్ ఆల్ స్పేస్ 340 లీటర్ల బూట్ స్పేస్ ను కలిగి ఉంది. అయితే దీన్ని 1274 లీటర్ల వరకు విస్తరించుకునే అవకాశముంది. అయితే టిగ్వాన్ లో 615 లీటర్ల బూట్ స్పేస్ ను కలిగి ఉండటమే కాకుండా.. దీన్ని 1655 లీటర్ల వరకు పెంచుకోవచ్చు. ఇందులో వెనుక సీటును మడుచుకునే అవకాశముంది. టిగ్వాన్ ఆల్ స్పేస్ ఇంధన ట్యాంకు సామర్థ్యం 60 లీటర్లు కాగా.. టిగ్వాన్ లో మాత్రం 71 లీటర్లు ఉండి ఆల్ స్పేస్ కంటే మెరుగ్గా ఉంది.