నేటి నుంచి ఏపీ అసెంబ్లీ బడ్జెట్ సమావేశాలు.. పలు కీలక అంశాలపై చర్చ

ఆంధ్రప్రదేశ్ అసెంబ్లీ బడ్జెట్ సమావేశాలు నేటి (జులై 11) నుంచి ప్రారంభమవుతున్నాయి. ఉదయం 9 గంటలకు సమావేశాలు ప్రారంభమవుతాయి. వైఎస్‌ఆర్‌సీపీ అధికారంలోకి వచ్చిన తర్వాత శాసనసభలో ప్రవేశపెడుతున్న తొలి బడ్జెట్ కావటంతో ప్రభుత్వం దీన్ని ప్రతిష్టాత్మకంగా తీసుకుంది. మొత్తం 14 పని దినాల్లో రాష్ట్ర బడ్జెట్తో పాటు వివిధ అంశాలను చర్చించాలని బీఏసీ సమావేశంలో నిర్ణయించారు. ముఖ్యంగా రాష్ట్ర బడ్జెట్తో పాటు వివిధ ప్రజా సమస్యలపై చర్చించాలని ప్రభుత్వం నిర్ణయించింది. తొలిరోజు ప్రశ్నోత్తరాల కార్యక్రమంతో పాటు సీఎం జగన్ బీఏసీ సమావేశంలో తీసుకున్న నిర్ణయాల ప్రతిని సభ ముందుంచనున్నారు.

అటు జలవనరుల శాఖ మంత్రి అనిల్ కుమార్ యాదవ్.. రాష్ట్ర సాగనీటి అభివృద్ధి కార్పొరేషన్ 44వ వార్షిక ప్రణాళికను సభకు సమర్పించనున్నారు. అనంతరం రాష్ట్రంలో కరవుపై ముఖ్యమంత్రి ప్రకటన చేయనున్నారు. బడ్జెట్ అనంతరం 23 అంశాలను చర్చించేందుకు అధికార పార్టీ వైఎస్‌ఆర్‌సీపీ, మూడు అంశాలపై చర్చించేందుకు తెలుగుదేశం పార్టీ బీఏసీ సమావేశంలో ప్రతిపాదించాయి.

తెదేపా నేతలపై దాడులు, విత్తనాల కొరత, రాష్ట్రంలోని కరవు పరిస్థితుల వంటి అంశాలను సభలో చర్చించేందుకు టీడీపీ ప్రతిపాదించగా.. వైఎస్‌ఆర్‌సీపీ నవరత్నాలతో పాటు, రాజధాని భూకేటాయింపులు, కొత్త మధ్య విధానం వంటి 23 అంశాలపై చర్చించాలని ప్రతిపాదించింది.

తొలిరోజు శాసనసభ ప్రశ్నోత్తరాల్లో భాగంగా రాష్ట్రంలో రహదారుల శిథిలావస్థతో పాటు ఎర్రచందనం అక్రమ రవాణా, సాగునీటి ప్రాజెక్టుల పురోగతి, విద్యాహక్కు చట్టం అమలు, రాష్ట్ర రుణ స్థితి, అవయవాల అక్రమ వ్యాపారం, సామాజిక పింఛన్ల కోసం వయోపరిమితి వంటి అంశాలపై మంత్రులు సమాధానం ఇవ్వనున్నారు.

ఇక శాసనమండలిలోనూ రాష్ట్రంలో గుట్కా నిషేధం, ఏపీ వ్యవసాయ మిషన్ , రైతులకు ఇన్ పుట్ సబ్సిడీ, వైఎస్ఆర్ చేయూత, అంగన్‌వాడీ కేంద్రాల్లో పౌష్టికాహారం, చేనేత పరిశ్రమల రక్షణ, రాష్ట్రంలో ప్రైవేటు పరిశ్రమల ఏర్పాటు, తిరుమల తిరుపతి దేవస్థానంలో ఆభరణాల ఆడిటింగ్ వంటి అంశాలపై ప్రభుత్వం సమాధానం ఇవ్వనుంది.