బడ్జెట్ 2017: స్మార్ట్‌ఫోన్ ధరలు పెరగొచ్చు!

కొత్తగా స్మార్ట్‌ఫోన్ కొనాలనుకుంటున్నారా? అయితే గతంతో పోల్చుకుంటే ఇప్పుడు మీరు కొంచెం ఎక్కువ ఖర్చుచేయాల్సి ఉంటుంది. కేంద్ర ఆర్థిక మంత్రి అరుణ్ జైట్లీ నేడు పార్లమెంటులో ప్రవేశపెట్టిన బడ్జెట్ ఈ మేరకు సూచన ప్రాయంగా పేర్కొంది. బడ్జెట్‌లో తీసుకున్న కొత్త నిర్ణయాల కారణంగా మొబైల్ ఫోన్లలో వాడే ప్రింటెడ్ సర్య్కూట్ బోర్డుల (PCBs) ధరలు పెరగనున్నాయి. ఈ పీసీబీల ధర స్మార్ట్‌ఫోన్ ధరలో 25 నుంచి 30 శాతం వరకు ఉంటుంది. కాబట్టి వీటి ధరలు పెరిగితే ఆటోమేటిక్‌గా స్మార్ట్‌ఫోన్ ధరలు కూడా పెరగడం ఖాయం.

పీసీబీల దిగుమతిపై అదనంగా 2 శాతం ప్రత్యేక సుంకాన్ని విధిస్తున్నట్లు బడ్జెట్‌ ప్రసంగంలో అరుణ్ జైట్లీ వెల్లడించారు. ఇవి విదేశాల నుంచి భారత్‌కు అధికంగా దిగుమతి అవుతున్నాయి. దేశీ పరిశ్రమల మనుగడను కాపాడటానికే ప్రభుత్వం ఈ నిర్ణయం తీసుకుంది. దేశీయంగా పీసీబీలను తయారుచేస్తున్న కంపెనీలకు లాభం చేకూరేందుకే దిగుమతిపై సుంకం విధుస్తున్నట్లు అరుణ్ జైట్లీ చెప్పారు. ఏదేమైనా ఎప్పటికప్పుడు స్మార్ట్‌ఫోన్‌లను మార్చేసే మొబైల్ ప్రేమికులకు ఇది చేదు వార్తే.