బడ్జెట్ ఎఫెక్ట్: ధరలు పెరిగేవి ఏవి? తగ్గేవి ఏవి?

ఏయే వస్తువుల ధరలు తగ్గుతాయి..? ఏయే ధరలు పెరుగుతాయి..? బడ్జెట్ ప్రవేశపెట్టిన తర్వాత ప్రతి ఏటా తలెత్తే ప్రశ్న ఇది. ఈసారి బడ్జెట్‌కు ముందే మొబైల్ హాండ్‌సెట్ల ధరలు పెరుగుతాయే సంకేతాలు వెలువడ్డాయి. అందుకు అనుగుణంగా మొబైల్ ఫోన్ల ధరలు పెరగనున్నాయి. విడిభాగాలను దిగుమతి చేసుకొని ఇక్కడ అసెంబ్లింగ్ చేసే ఫోన్లపై ఈ ప్రభావం ఉండనుంది. కార్లు, మోటార్ బైకులు, ఫ్రూట్ జ్యూస్‌లు, పర్‌‌ఫ్యూమ్‌లు, పాదరక్షల ధరలు పెరగనున్నాయి. వీటిపై కస్టమ్ సుంకాన్ని పెంచడమే ఇందుకు కారణం.

దిగుమతి చేసుకునే ముడి జీడిపప్పు, సోలార్ ట్యాంపర్డ్ గ్లాస్, వినికిడి కోసం ఉపయోగించే పరికరాల ధరలు తగ్గుతాయి. వీటిపై ప్రభుత్వం దిగుమతి సుంకాలను తగ్గించింది.

ధరలు పెరిగే వస్తువులివే..

కార్లు, మోటార్ సైకిళ్లు, మొబైల్ ఫోన్లు, వెండి, బంగారం, కూరగాయలు, పండ్ల రసాలు, సన్‌గ్లాసెస్, పెర్‌ఫ్యూమ్స్, మెనీక్యూర్, పెడిక్యూర్ వస్తువులు, షేవింగ్‌కు సంబంధించిన వస్తువులు, డియోడ్రెంట్స్, సెంట్ స్ప్రేలు, టాయిలెట్ స్ప్రేలు, ట్రక్, బస్ రేడియల్ టైర్స్, సిల్క్ ఫ్యాబ్రిక్స్, పాదరక్షలు, రంగు రాళ్లు, డైమండ్స్, స్మార్ట్ వాచ్‌లు, ఎల్‌సీడీ, ఎల్‌ఈడీ టీవీ ప్యానెళ్లు, ఫర్నీచర్, చాపలు, ల్యాంప్స్, చేతి గడియారాలు, పాకెట్ వాచ్‌లు, గడియారాలు, ట్రై సైకిల్స్, స్కూటర్లు, పెడల్ కార్లు, చక్రాల బొమ్మలు, బొమ్మలు, పిల్లల పజిల్స్, వీడియో గేమ్ కన్సోల్స్, ఆట బొమ్మలు, సిగరెట్లు, లైటర్లు, కొవ్వొత్తులు, గాలి పటాలు, ఆలివ్ ఆయిల్, కొబ్బరి నూనె లాంటి వెజిటబుల్ ఆయిల్స్ ధరలు పెరుగుతాయి.

ధరలు తగ్గేవి:

ముడి జీడిపప్పు, సోలార్ ప్యానెళ్ల తయారీకి వాడే సోలార్ టెంపర్డ్ గ్లాస్, వినికిడి సమస్యల పరికరాల విడిభాగాలు, లీనియర్ మోషన్ గైడ్స్, బాల్ స్క్రూస్.