Senior Citizen Term Deposit schemes: బ్యాంకు డిపాజిటర్లకు గమనిక.. వచ్చే నెల 1 నుంచి ఈ రెండు స్కీమ్స్ బంద్!

Senior Citizen Term Deposit schemes: కరోనా సమయంలో చాలా బ్యాంకులు సీనియర్ సిటిజన్ల కోసం ప్రత్యేకంగా టర్మ్ డిపాజిట్ స్కీమ్‌( Term Deposit schemes)లను ప్రవేశపెట్టాయి. ఈ డిపాజిట్ స్కీమ్‌లలో సీనియర్ సిటిజన్లకు ప్రస్తుతం అందిస్తున్న అదనపు 50 బేసిస్ పాయింట్లకు మరింత ఎక్కువగా వడ్డీ రేట్లను బ్యాంకులు అందించాయి. హెచ్‌డీఎఫ్‌సీ బ్యాంకు, ఐసీఐసీఐ బ్యాంకు, ఐడీబీఐ బ్యాంకు, ఎస్‌బీఐ వంటివి పలు రకాల స్పెషల్ ఫిక్స్‌డ్ డిపాజిట్ స్కీమ్‌లను తీసుకొచ్చాయి. అయితే ఎస్‌బీఐ ఇటీవలే సీనియర్ సిటిజన్ల కోసం తీసుకొచ్చిన వీకేర్ టర్మ్ డిపాజిట్ స్కీమ్‌ను పొడిగించగా.. హెచ్‌డీఎఫ్‌సీ బ్యాంకు, ఐడీబీఐ బ్యాంకులు మాత్రం షాకిచ్చాయి. అక్టోబర్ 1, 2022 నుంచి సీనియర్ సిటిజన్ల కోసం తీసుకొచ్చిన తమ స్పెషల్ ఫిక్స్‌డ్ డిపాజిట్ స్కీమ్‌లను ఆపివేస్తున్నట్టు తెలిపాయి. దీంతో ఇక నుంచి హెచ్‌డీఎఫ్‌సీ, ఐడీబీఐ బ్యాంకు సీనియర్ సిటిజన్ కస్టమర్లకు ఈ స్కీమ్‌లు అందుబాటులో ఉండవు. హెచ్‌డీఎఫ్‌సీ బ్యాంకు స్పెషల్ ఎఫ్‌డీ(HDFC Bank Special FD)... సీనియర్ సిటిజన్ కేర్ ఎఫ్‌డీ స్కీమ్‌ను హెచ్‌డీఎఫ్‌సీ బ్యాంకు మే 18, 2020న ప్రవేశపెట్టింది. ఈ స్కీమ్ ఈ నెల చివరి వరకే యాక్టివ్‌లో ఉండనుంది. ఆ తర్వాత ఈ స్కీమ్ అందుబాటులో ఉండదు. ఈ స్కీమ్ మెచ్యూరటీ కాల వ్యవధి ఐదు నుంచి పదేళ్లు. ఈ స్కీమ్‌పై హెచ్‌డీఎఫ్‌సీ బ్యాంకు 6.50 శాతం మేర వడ్డీ రేటును ఆఫర్ చేస్తుంది. బ్యాంకు అందించే 5.75 శాతం స్టాండర్డ్ రేటు కంటే 75 బేసిస్ పాయింట్లు అత్యధికం.

రూ.5 కోట్ల కంటే తక్కువ మొత్తానికి ఐదేళ్ల ఒక రోజు నుంచి పదేళ్ల కాల వ్యవధిలో ఈ డిపాజిట్ స్కీమ్‌ను బుక్ చేసుకున్న సీనియర్ సిటిజన్లకు బ్యాంకు ప్రస్తుతం అందిస్తున్న 0.50 శాతం ప్రీమియానికి, అదనంగా మరో 0.25 శాతం ప్రీమియాన్ని అందించనున్నట్టు తెలిపింది. అయితే 18 మే, 2020 నుంచి సెప్టెంబర్ 30, 2022 మధ్యలో ఈ స్కీమ్‌ను బుక్ చేసుకున్నవారికి మాత్రమే ఈ వర్తింపు. ఆ తర్వాత దీనిపై ఎలాంటి ప్రయోజనాలను సీనియర్ సిటిజన్లు పొందరు. అక్టోబర్ 1, 2022 నుంచి ఈ స్కీమ్ అందుబాటులో ఉండదు.

ఐడీబీఐ బ్యాంకు స్పెషల్ ఎఫ్‌డీ స్కీమ్(IDBI Bank Special FD).. ప్రైవేట్ రంగానికి చెందిన ఐడీబీఐ బ్యాంకు కూడా సీనియర్ సిటిజన్ల కోసం నమాన్ సీనియర్ సిటిజన్ డిపాజిట్ స్కీమ్‌ను తీసుకొచ్చింది. ఈ స్పెషల్ స్కీమ్ మెచ్యూరిటీ కాల వ్యవధి ఏడాది నుంచి పదేళ్ల మధ్యలో ఉంది. 20 ఏప్రిల్ 2020 నుంచి ఈ స్కీమ్‌ను ఆఫర్ చేస్తుంది. 30 సెప్టెంబర్ 2022తో ఈ గడువు ముగుస్తుంది. ఈ స్కీమ్‌లో చేరిన వారికి అదనంగా 0.75 శాతం వడ్డీని అందిస్తుంది.

Also Read: లోన్లు తీసుకున్న వారికి బ్యాడ్‌న్యూస్.. వరుసగా 4వ సారి మోత!
Also Read: గూగుల్, ఫేస్‌బుక్ కంపెనీలు కీలక నిర్ణయం? ఉద్యోగులకు ఝలక్!