పల్సర్ 200ఎన్ఎస్ బైక్ బుకింగ్స్ షురూ..

బజాజ్ పల్సర్‌కు యూత్‌లో ఉన్న క్రేజ్ తెలిసిందే. ఈ సంస్థ కొత్త పల్సర్‌ మోడల్‌ను మార్కెట్లోకి తీసుకొస్తోంది. 2017 పల్సర్ 200ఎన్ఎస్ మోడల్‌ గురించి ఇప్పటికే సోషల్ మీడియా ద్వారా బజాజ్ విపరీతంగా ప్రచారం చేసింది. వెయ్యి రూపాయల టోకెన్ అడ్వాన్స్ తీసుకొని డీలర్లు ఈ బైక్ బుకింగ్‌లను కూడా ప్రారంభించారు. ఫిబ్రవరి మొదటి వారంలో లేదా రెండో వారంలో బైక్‌ను డెలివరీ చేస్తామని వారు చెబుతున్నారు. ముంబై‌లో ఈ బైక్ ఆన్ రోడ్ ధర రూ.1,16,200గా ఉంది. పాత మోడళ్లతో పోలిస్తే.. కొత్త బైక్‌ మరింత స్పోర్టియర్‌గా కనిపిస్తోంది. ఈ బైక్‌ల 199.5 సీసీ ఇంజిన్‌ను వాడారు. పల్సర్ ఏఎస్ సిరీస్ తరహాలోనే ఇందులోనూ సింగిల్ సిలిండర్, లిక్విడ్ కూల్డ్, 4 వాల్వ్, ట్రిపుల్ స్పార్క్ ఇంజిన్‌ను ఉపయోగించారు. భారత్ స్టాండర్డ్ -4 ప్రమాణాలను అందుకునేలా ఈ బైక్ ఉంటుందని అంచనా.

2017 బజాజ్ పల్సర్ ఎన్ఎస్200 మోడల్‌ను గతంలో టర్కీలో ప్రదర్శించారు. టీవీఎస్ అపాచీ ఆర్‌టీఆర్ 200 4వీకి దీటుగా బజాజ్ ఈ మోడల్‌ను మార్కెట్లోకి తీసుకొస్తోంది. కొత్త బైక్‌లో బాడీ గ్రాఫిక్స్‌ను మెరుగుపరిచారు. డిఫరెంట్ అల్లాయ్ వీల్స్‌తో ఉన్న ఈ బైక్ దాదాపు ఆర్ఎస్ 200 మోడల్ ఫీచర్లనే కలిగి ఉంది. ఈ బైక్‌లో 280 ఎంఎం ఫ్రంట్ డిస్క్, 230 ఎంఎం బ్యాక్ డిస్క్‌లను ఏర్పాటు చేశారు. ఈ బైక్ 2017 మిల్లీమీటర్ల పొడవు, 1075 ఎంఎం ఎత్తు ఉంటుంది.