2019 Suzuki Hayabusa: కొత్త 'హయబుస' బైక్.. ధర తెలిస్తే షాక్

ప్రముఖ వాహన తయారీ సంస్థ సుజుకీ మోటర్‌సైకిల్‌ ఇండియా ప్రైవేట్‌ లిమిటెడ్‌ సరికొత్త హంగులతో నూతన బైకును గురువారం (డిసెంబరు 27) భారత మార్కెట్లోకి ప్రవేశపెట్టింది. గత 20 ఏళ్లుగా దేశీయ యువతను వివిధ మోడళ్ల రూపంలో ఆకట్టుకుంటున్న హయబుస.. సరికొత్తగా 'హయబుస 2019' ఎడిషన్‌తో మరోసారి విపణిలోకి వచ్చేసింది. రెండు సరికొత్త రంగుల్లో (మెటాలిక్ వూర్ట్ గ్రే, గ్లాస్ స్పార్కిల్ బ్లాక్) అందుబాటులోకి వచ్చిన ఈ బైక్ ధరను ఢిల్లీ ఎక్స్ షోరూంలో రూ.13.74 లక్షలుగా నిర్ణయించారు.

మారుతున్న టెక్నాలజీ, ప్రత్యర్థుల నుండి ఎదురయ్యే పోటీ, వినియోగదారులు తమ నుండి కోరుకునే సదుపాయాలను దృష్టిలో పెట్టుకుని సుజుకి సంస్థ 'హయబుస 2019' మోడల్ బైక్‌ను రూపొందించింది. ప్రధానంగా ఉన్నతశ్రేణి యువత లక్ష్యంగా.. గత మోడల్‌ని సరికొత్త హంగులతో మార్పులు చేసినట్లు సుజుకి సంస్థ వెల్లడించింది.

ఫీచర్లు..
* ఈ సరికొత్త బైకులో 1,340 సీసీ ఇంజిన్‌ను అమర్చారు.
* భారతీయ పరిస్థితులకు అనుగుణంగా సైడ్‌ రిఫ్లెక్టర్స్‌ను ఈ కొత్త బైక్‌లో అమర్చారు.
* అత్యాధునిక గ్రాఫిక్స్‌తో సరికొత్త రంగులతో దీన్ని తీర్చిదిద్దారు.
* ఈ బైక్ కేవలం 2.74 సెకన్లలోనే 0 నుండి 100 కేఎంపీహెచ్ వేగాన్ని అందుకోగలదు.
* గంటకు 299 కిలోమీటర్ల గరిష్ఠవేగంతో దూసుకెళ్లగలదు.