త్వరలో మరింత తగ్గనున్న పుత్తడి!!

అమాంతం పైకి ఎగిసిన పుత్తడి ఇప్పుడు నేల చూపులు చూస్తోంది. నోట్ల రద్దుతో బంగారం కొనుగోళ్లు తగ్గడంతో మార్కెట్లు కళ తప్పి బోసి పోతున్నాయి. అంతే కాకుండా అంతర్జాతీయ మార్కెట్లలోనూ పరిణామాలు చోటుచేసుకోవడంతో స్వచ్చమైన పది గ్రాముల బంగారం ధర రూ.26,000 దిగువకు వచ్చే అవకాశం ఉందని నిపుణులు అంచనా వేస్తున్నారు.

ఈ విషయం సామాన్యులకు సంతోషం కలిగించినా బులియన్ మార్కెట్‌పై ప్రభావం చూపుతుందని అంటున్నారు. కొద్ది రోజుల క్రితం పది గ్రాముల పుత్తడి ధర రూ.32,000 మార్క్ దాటి సామాన్యుడి అందనంత ఎత్తున నిలిచింది. అయితే నోట్ల రద్దు తర్వాత క్రమంగా దిగి రావడంతో వ్యాపారులు అందోళన వ్యక్తం చేస్తున్నారు. అంతర్జాతీయ మార్కెట్‌లో పసిడి ధరలు స్థిరంగా ఉన్నా, దేశీయంగా మాత్రం పతనం కొనసాగుతోంది.

పది గ్రాముల 24 క్యారెట్ల బంగారం ధర ఈ రోజు గ్రామునకు రూ.50 తగ్గి రూ.27,800కు, పది గ్రాముల 22 క్యారెట్ల బంగారం ధర రూ.26,530కు చేరుకుంది. కిలో వెండి ధర రూ.38,810గా నమోదైంది. పసిడి ధరలు పతనమవడానికి అంతర్జాతీయ మార్కెట్లో నెలకొన్న పరిస్థితులే కారణమని నిపుణులు విశ్లేషిస్తున్నారు. దీనికితోడు నోట్ల రద్దు కూడా బంగారం కొనుగోళ్లపై తీవ్ర ప్రభావం చూపిందని అంటున్నారు.