తెలంగాణ‌లో రెరా ప‌రిధిలోకి 5000 ప్రాజెక్టులు

తెలంగాణలో రెరా పరిధిలోకి ఐదు వేల ప్రాజెక్టులు వస్తాయని రాష్ట్ర రెరా మెంబర్ సెక్రటరీ కె.విద్యాధర్ వెల్లడించారు. క్రెడాయ్ తెలంగాణ ఆధ్వర్యంలో రెరా చట్టంపై శుక్రవారం జరిగిన అవగాహన సదస్సుకు ముఖ్య అతిథిగా విచ్చేసిన ఆయన మాట్లాడుతూ.. రెరా పోర్టల్‌ను ఆగస్టు 15 నుంచి అందుబాటులోకి తెచ్చేందుకు ప్రయత్నిస్తున్నామని తెలిపారు.

రెరా రాష్ట్ర కార్యాలయాన్ని ఏసీ గార్డ్స్‌లోని డీటీసీపీ ప్రాంగణంలో ఏర్పాటు చేశామన్నారు. రాష్ట్రంలోని కార్పొరేషన్లు, పట్టణాభివృద్ధి సంస్థలు, మున్సిపాలిటీలు, నగర పంచాయతీల్లో 2017 జనవరి 1 తర్వాత ఆరంభమైన ప్రాజెక్టులన్నీ రెరా పరిధిలోకి వస్తాయన్నారు. కొత్తగా ప్రాజెక్టును ప్రారంభించేవారు స్థానిక సంస్థల నుంచి అనుమతులన్నీ తీసుకున్నాకే రెరా వద్ద నమోదు చేసుకోవాలని సూచించారు. పురపాలక శాఖ డైరెక్టర్ బాలకృష్ణ మాట్లాడుతూ.. నిబంధనల ప్రకారం నిర్మాణాల్ని చేపట్టే డెవలపర్లకు రెరా వల్ల ఇబ్బందులుండవన్నారు. తెలంగాణలో 99 శాతం బిల్డర్లు నిబంధనల ప్రకారమే అపార్టుమెంట్లను నిర్మిస్తున్నందున రెరా చట్టం వల్ల పెద్దగా సమస్యలుండవని అభివర్ణించారు. రెరా అమలు ద్వారా నిర్మాణ రంగానికి పూర్తి సహాయ సహకారాలను అందించేందుకు ప్రభుత్వం సిద్ధంగా ఉందన్నారు.