ఈ మినరల్ వాటర్ బాటిల్ ధర రూ.65 లక్షలు!

లీటర్ మినరల్ వాటర్ బాటిల్ ధర రూ.65 లక్షలు. మీరు చదివింది కరక్టే. కొంపదీసి అమృతాన్ని ఇలా బాటిల్‌లో పెట్టి అమ్మేస్తున్నారా అని ఆలోచించవద్దు. అందులో ఉన్నది నూరు శాతం స్వచ్ఛమైన నీరే. పోనీ, కరువు కంట్రీల్లో ఆ బాటిల్‌ను ఇంత ధరకు అమ్మేస్తున్నారా? అని కూడా అనుకోవద్దు. ఎందుకంటే.. అంత డబ్బు ఇచ్చి ఈ లీటర్ బాటిల్ కొనేబదులు.. ఏదైనా నీటి ప్రాజెక్టు ఏర్పాటు చేసుకోవచ్చు. దీని ప్రత్యేకత ఏమిటో చూడండి.

బెవర్లీ హిల్స్ డ్రింక్ కంపెనీ ప్రపంచవ్యాప్తంగా తమ వ్యాపారాన్ని విస్తరించడంలో భాగంగా ఇండియాలో సరికొత్త లగ్జరీ డ్రింకింగ్ వాటర్‌ సీరిస్‌ను ప్రవేశపెడుతోంది. ఆ బాటిల్ పేరు బెవర్లీ హిల్స్ 90H2O. ఇందులో నీరు ఎంతో స్వచ్ఛంగా, శరీరానికి అవసరమైనన్ని మినరల్స్‌తో చాలా టేస్టీగా ఉంటుంది. కాలిఫోర్నియా పర్వతాల్లో 5000 అడుగుల ఎత్తు నుంచి జాలువారే నీటిని ఒడిసి పట్టి మరీ అందిస్తున్నారంట. ఆ మాత్రానికే అంత ధరా అని ఆశ్చర్యపోవద్దు.

ఆ బాటిల్‌కు ఉండే తెల్లని మూతే చాలా ఖరీదైనది. ఎందుకంటే దాన్ని 14 క్యారెట్ల 600 G/VS తెల్లని వజ్రాలు, 250 నల్లని వజ్రాలతో డిజైన్ చేశారు. ఓ ప్రముఖ జ్యువెలరీ నిపుణుడు దీన్ని రూపొందించాడు. రూ.65 లక్షలు పెట్టి ఈ బాటిల్ కొనలేము అనుకునేవాళ్ల కోసం.. దాదాపు రూ.6వేలు విలువ చేసే లగ్జరీ కలెక్షన్స్ 500 ఎం.ఎల్. బాటిళ్లను కూడా ఈ సంస్థ అందుబాటులోకి తెస్తోంది. ఈ బాటిల్ కొనేందుకు మన బ్యాంకులు లోన్లు ఇస్తాయో లేదో!!