ఎయిర్‌టెల్ వినియోగదారులకు గుడ్ న్యూస్

రిలయెన్స్ జియో, వొడాఫోన్ తదితర కంపెనీల నుంచి వస్తున్న పోటీ నేపథ్యంలో ఎయిర్‌టెల్‌ తన వినియోగదారులకు శుభవార్త అందించింది. రూ.349, రూ.549 ప్యాక్స్‌లో కీలక మార్పులు చేసింది. ఆ ప్యాక్‌లపై 500 ఎంబీ అదనపు డేటాను అందించనున్నట్లు కంపెనీ తెలిపింది. ఎయిర్‌టెల్‌ రూ.349 ప్లాన్‌ను సెప్టెంబర్‌లో తీసుకొచ్చింది. ప్రారంభంలో 1 జీబీ డేటాతో పాటు అపరిమిత లోకల్‌, ఎస్టీడీ కాల్స్‌ అందించేది. జియో తన రీఛార్జి ప్లాన్లను సవరించడంతో నవంబర్‌లో ఎయిర్‌టెల్‌ సైతం రూ.349 ప్లాన్‌ను మార్పు చేసింది. రోజువారీ డేటా పరిమితిని 1.5 జీబీకి పెంచింది. ఇప్పుడు ఆ ప్లాన్‌పై అదనంగా 500 ఎంబీ డేటా అందిస్తోంది. అంటే 28 రోజులకు 2 జీబీ డేటాతో పాటు అపరిమిత కాల్స్‌, 100 లోకల్‌ ఎస్టీడీ కాల్స్‌ లభిస్తాయన్నమాట.

ఇక రూ. 549 ప్లాన్‌పై ఇప్పటి వరకు 2.5 జీబీ డేటాను అందిస్తుండగా.. ఎయిర్‌టెల్ ఆ పరిమితిని 3 జీబీకి పెంచింది. 28 రోజుల వ్యాలిడిటీ ఉన్న ఈ ప్లాన్‌లో అపరిమిత లోకల్‌, ఎస్టీడీ కాల్స్‌తో పాటు 100 ఎస్సెమ్మెస్‌లు లభిస్తాయి.