జియోకి చెక్.. ఎయిర్‌టెల్ VoLTE సేవలు రెడీ!

ఇంతకాలం రిలయన్స్ జియోకి ఎంత పోటీనిచ్చినా ఎయిర్‌టెల్ 4జీ సేవలకే పరిమితమవడంతో కాస్త వెనకబడింది. దేశంలోనే తొలిసారిగా 4జీ వివోఎల్టీఈ సేవలను తీసుకొచ్చి టెలీకాం రంగంలో జియో ప్రకంపనలే సృష్టించింది. మొబైల్ డాటాను ఉపయోగించుకుని కాల్స్ చేసే సౌకర్యం ఉన్న ఈ వివోఎల్టీఈ నెట్‌వర్క్ ఏ టెలీకాం కంపెనీకి లేకపోవడంతో జియో పంటపండింది. జియోను ఎదుర్కోవడానికి కంపెనీలన్నీ నానా తంటాలు పడ్డాయి.

అయితే ఇప్పుడు ఎయిర్‌టెల్ కూడా వివోఎల్టీఈ నెట్‌వర్క్‌ను ప్రవేశపెడుతోంది. ఇప్పటికే పలు మెట్రో నగరాల్లో ఈ నెట్‌వర్క్‌ను విజయవంతంగా పరీక్షించిన ఎయిర్‌టెల్ వచ్చే వారంలో ముంబై నుంచి ఈ సేవలను ప్రారంభించనుంది. ఆ తరవాత కోల్‌కతాతో పాటు ఇతర మెట్రో నగరాలు, ప్రధాన పట్టణాల్లో ఎయిర్‌టెల్ 4జీ వివోఎల్టీఈ సేవలు ప్రారంభమవుతాయి.

ఈ వాయిస్ ఓవర్ ఎల్టీఈ టెక్నాలజీతో ఎయిర్‌టెల్ వాయిస్ కాల్స్‌ మరింత నాణ్యతతో చేసుకోవచ్చు. అంతేకాకుండా డాటా ద్వారా మాత్రమే కాల్స్ వెళ్తాయి కాబట్టి జియో మాదిరిగానే ఎయిర్‌టెల్ కూడా వాయిస్ కాల్స్‌ను ఉచితంగానే అందించే అవకాశం ఉంది. ప్రస్తుతం ఎయిర్‌టెల్ డేటాను మాత్రమే 4జీ నెట్‌వర్క్‌పై అందిస్తోంది. వాయిస్ కాల్స్ మాత్రం 3జీ, 2జీ నెట్‌వర్క్ ద్వారా చేసుకుంటున్నారు. కానీ 4జీ వివోఎల్టీఈ అందుబాటులోకి వస్తే డాటా, వాయిస్ కాల్స్ ఇదే నెట్‌వర్క్‌పై పనిచేస్తాయి. మొత్తానికి జియోకి గట్టి పోటీ ఇవ్వడానికి ఎయిర్‌టెల్ సిద్ధమవుతోంది.