ఎయిర్‌టెల్ కొత్త ఆఫర్.. రూ.3కే 1జీబీ

రిలయన్స్ జియో వచ్చిన తరవాత టెలీకాం రంగంలో పోటీ తీవ్రంగా పెరిగిపోయింది. అన్ని టెలీకాం కంపెనీలు పోటాపోటీగా ప్లాన్లను ప్రకటిస్తున్నాయి. ఈ క్రమంలో భారతీ ఎయిర్‌టెల్ తన ప్రీపెయిడ్ వినియోగదారుల కోసం సరికొత్త ఆఫర్‌ను తీసుకొచ్చింది. రూ.499 ప్రీపెయిడ్ రీఛార్జ్‌తో రోజుకి 2జీబీ డాటా అందిస్తోంది. అంతేకాకుండా అపరిమిత లోకల్‌, ఎస్టీడీ కాల్స్‌, ఉచిత రోమింగ్, రోజుకు 100 ఎస్ఎంఎస్‌లు అదనం. కాలపరిమితి 82 రోజులు. అంటే మొత్తం కాలపరిమితిలో యూజర్ 164 జీబీ డాటాను పొందొచ్చు. దీన్ని బట్టి 1 జీబీ డాటా సుమారు రూ.3కే వస్తోంది.

అయితే కాల్స్ అపరిమితమని చెప్తున్నప్పటికీ ఎయిర్‌టెల్ పరిమితి విధించడం గమనార్హం. రూ.499 ఆఫర్‌ కింది రోజుకు 300 నిమిషాలు, వారానికి 1000నిమిషాలు ఉచితంగా మాట్లాడుకోవచ్చు. ఆ తర్వాత నిమిషానికి 30 పైసలు వసూలు చేస్తారు. ప్రస్తుతం ఇండియన్ ప్రీమియర్ లీగ్ నడుస్తు్న్న నేపథ్యంలో టెలీకాం కంపెనీలన్నీ డాటా ఆఫర్లపై దృష్టి పెట్టాయి. దీనిలో భాగంగానే రిలయన్స్ జియో, బీఎస్ఎన్‌ఎల్‌కు ఎయిర్‌టెల్ ఈ ప్రీపెయిడ్ డాటా ఆఫర్‌ను తీసుకొచ్చింది. దీనికి తోడు, ఎయిర్‌‌టెల్ టీవీ యాప్ ద్వారా ఎయిర్‌టెల్ వినియోగదారులు ఐపీఎల్ లైవ్ మ్యాచ్‌లను, హైలైట్స్‌ను ఉచితంగా చూడొచ్చు.

అయితే ఎయిర్‌టెల్ ఇప్పటికే రూ.448 ఆఫర్‌ను అందిస్తోంది. దీని కాలపరిమితి కూడా 82 రోజులే అయినప్పటికీ రూ.499తో పోలిస్తే డాటా కాస్త తక్కువ. ఈ ఆఫర్‌ కింద రోజుకు 1.4 జీబీ డాటా మాత్రమే వస్తుంది. అంటే మొత్తం కాలపరిమితిలో 114.8 జీబీ డాటాను వినియోగదారులు వాడుకోవచ్చు. ఇక అపరిమిత కాల్స్, ఉచిత రోమింగ్, రోజుకు 100 ఎస్ఎంఎస్‌లు మామూలే. ఇదిలా ఉంటే, ఐపీఎల్‌ సీజన్‌ కోసం రిలయన్స్‌ జియో రూ.251 ఐపీఎల్‌ ప్యాక్‌ను తీసుకొచ్చిన సంగతి తెలిసిందే. 51 రోజుల పాటు 104జీ డేటాను వినియోగించుకోవచ్చు. ఇక బీఎస్‌ఎన్‌ఎల్‌ కూడా రూ.248కే రోజుకు 3జీబీ డేటాను అందిస్తోంది. 51 రోజులు కాలపరిమితి.