రూ. 10 నాణేల చెల్లుబాటు.. ఆర్‌బీఐ క్లారిటీ

పది రూపాయల నాణేల చెల్లుబాటుపై భారతీయ రిజర్వు బ్యాంక్ క్లారిటీ ఇచ్చింది. అవి చెల్లుబాటు కావంటూ వస్తున్న వార్తలు పుకార్లేనని స్పష్టం చేసింది. ప్రస్తుతం మొత్తం 14 రకాల డిజైన్లలో రూ.10 నాణేలు చెలామణిలో ఉన్నాయని, అవన్నీ చెల్లుబాటు అవుతాయని ఆర్‌బీఐ బుధవారం (జనవరి 17) ప్రకటించింది. లావాదేవీలకు లీగల్‌ టెండర్‌గా వీటిని కొనసాగించవచ్చని తెలిపింది. కొన్ని వర్గాల ప్రజలు, చిన్న వ్యాపారులు పది రూపాయల నాణేలను తీసుకోడానికి తిరస్కరిస్తున్నారు. ఈ నేపథ్యంలో ఆర్‌బీఐ స్వయంగా రంగంలోకి దిగి వీటిపై స్పష్టతనిచ్చింది. ఈ ప్రకటన విడుదల చేసింది.

ఆర్థిక, సామాజిక, సాంస్కృతిక అంశాలు ప్రతిబింబించేలా ఎప్పటికప్పుడూ వివిధ ఫీచర్లతో రూ.10 నాణేలను ప్రవేశపెడుతున్నామని, ఇప్పటివరకూ 14 రకాల నాణేలను విడుదల చేశామని ఆర్‌బీఐ తెలిపింది.

ఈ నాణేల చట్టబద్ధత విషయంలో ఎలాంటి అనుమానాలు అవసరం లేదని, వీటిని లావాదేవీల కోసం వినియోగించుకోవచ్చని ఆర్‌బీఐ స్పష్టం చేసింది. బ్యాంకులు కూడా ఈ నాణేలను స్వీకరించాలని, బ్రాంచుల వద్ద వీటిని మార్చుకోవచ్చని తెలిపింది.