Income Tax: ఈ-ఫైలింగ్‌కు 7 ఐటీఆర్ ఫారాలు రెడీ

ఈ-ఫైలింగ్‌ ద్వారా ఐటి రిటర్న్‌లు ఫైల్‌ చేసే పన్ను చెల్లింపుదారుల కోసం 7 రకాల ఐటీఆర్ ఫారాలు ఈ-ఫైలింగ్‌ వెబ్‌సైట్‌లో అందుబాటులోకి వచ్చాయి. ఈ మ‌దింపు సంవత్సరం (2018-19) నుంచి వివిధ రకాల ఆదాయ పన్ను (ఐటీ) చెల్లింపుదారుల కోసం ఏడు రకాల ఐటీఆర్‌ ఫారాలు అందుబాటులోకి తెస్తున్నట్టు కేంద్ర ప్రత్యక్ష పన్నుల బోర్డు (సిబిడిటి) ఈ సంవత్సరం ఏప్రిల్‌ 5న ప్రకటించింది.

ఈ-ఫైలింగ్‌ పరిధిలోకి వచ్చే ప్రతి పన్ను చెల్లింపుదారుడు తమకు సంబంధించిన ఐటిఆర్‌ ఫారాన్నిఐటీ శాఖకు చెందిన www.incometaxindiaefiling.gov.in వెబ్‌పోర్టల్‌ ద్వారా వచ్చే జూలై 31లోగా ఫైల్‌ చేయాలి. వార్షిక జీతం రూ.50 లక్షల వరకు ఉన్న ఉద్యోగులు, వ్యాపారులు ఐటీఆర్‌-1గా పిలిచే సహజ్‌ ఫారమ్‌ ద్వారా తమ రిటర్న్‌ ఫైల్‌ చేయాలి. ఈ సంవత్సరం నుంచి ఉద్యోగులుఐటీ రిటర్న్‌లో ఏ పద్దు కింద ఎంత జీతం వస్తోందనే శాలరీ బ్రేకప్‌ కూడా ప్రకటించాలి. వ్యాపారులైతే తమ టర్నోవర్‌తో పాటు, జిఎస్టీ నంబర్‌ పేర్కొనాలి. కేవలం గృహ ఆస్తులపై ఆదాయం వచ్చే వ్యక్తులు, ఫిక్స్‌డ్‌, రికరింగ్‌ డిపాజిట్లపై వడ్డీ ద్వారా అదనపు ఆదాయం వచ్చే వ్యక్తులు కూడా ఈ సంవత్సరం నుంచి ఐటీఆర్‌-1 ద్వారానే తమ రిటర్న్‌ సమర్పించాలి. వ్యక్తిగత పన్ను చెల్లింపుదారులు, హిందూ ఉమ్మ‌డి కుటుంబాలు, ప్రవాస భారతీయులు మాత్రం ఐటీఆర్‌-2 ఫైల్‌ చేయాలి. అయితే వ్యాపారాలు, వృత్తుల ద్వారా వచ్చే లాభాల ఆదాయం లేని వ్యక్తులే ఇందుకు అర్హులు. ఈ ఆదాయం ఉన్న వ్యక్తులు మాత్రం ఐటీఆర్‌-3 లేదా ఐటీఆర్‌-4 ఫైల్‌ చేయాలని సిబిడిటి పేర్కొంది.