Amazon Prime: యూజర్లకు అమెజాన్ ప్రైమ్ షాక్.. సబ్‌స్క్రిప్షన్ ధరలు పెంపు.. కొత్త రేట్లు ఇవే!

Amazon Prime: మీరు అమెజాన్ ప్రైమ్ వాడుతున్నారా? అయితే ఇకపై మీరు అధికంగా చెల్లించాల్సిందే. తాజాగా తమ ప్రైమ్ సబ్ స్క్రిప్షన్ ధరలను పెంచుతూ యూజర్లకు షాక్ ఇచ్చింది అమెజాన్. నెలవారీ సబ్ స్క్రిప్షన్ ప్లాన్‌ను ఏకంగా 67 శాతం మేర పెంచింది. మూడు నెలల ప్లాన్‌ను ధరలను సైతం సవరించింది. అయితే, ఏడాది ప్లాన్లలో మాత్రం మార్పులు చేయకుండా కాస్త ఊరట కలిగించడం గమనార్హం. ప్రైమ్ సబ్ స్క్రిప్షన్ సవరించిన ధరలు తక్షణమే అమలులోకి వస్తాయని తెలిపింది అమెజాన్. అయితే, ఇప్పటికే సబ్ స్క్రైబ్ చేసుకున్నవారికి జనవరి 15, 2024 పాత రేట్లే వర్తిస్తాయి. ఏదైనా కారణంగా రెన్యువల్ ఫెయిల్ అయితే కొత్త ధరకు ప్లాన్లను తీసుకోవాల్సి ఉంటుందని అమెజాన్ స్పష్టం చేసింది.

అమెజాన్ ప్రైమ్ సబ్ స్క్రిప్షన్ (amazon prime subscription plan) నెలవారీ చందా ప్రస్తుతం రూ.179గా ఉండగా.. దాన్ని రూ.299కు పెంచుతున్నట్లు తన సపోర్ట్ పేజీలో పేర్కొంది అమెజాన్. మూడు నెలల చందా రూ.459గా ఉండగా దానిని రూ.599కి పెంచింది. మరోవైపు.. అమెజాన్ ప్రైమ్ వార్షిక సబ్ స్క్రిప్షన్ రూ.1499 ఉండగా అందులో ఎలాంటి మార్పు చేయలేదు. దాంతో పాటు అమెజాన్ లైట్ వార్షిక సబ్ స్క్రిప్షన్‌ రూ.999కే లభిస్తోంది. ఈ లైట్ సబ్ స్క్రిప్షన్ (amazon prime membership) ధరలోనూ ఎలాంటి మార్పు చేయలేదు. ఇందులోనూ ప్రైమ్ సబ్ స్క్రిప్షన్‌లో ఉండే అన్ని సదుపాయాలూ ఉంటాయి. కానీ ప్రైమ్ వీడియో కంటెంట్‌ను ఎస్‌డీ క్వాలిటీలో మాత్రమే వీలుంటుంది. హెచ్‌డీ క్వాలిటీలో చూడడానికి లేదు. దాంతో పాటు అడ్వర్టైజ్‌మెంట్స్ వస్తాయి.

అమెజాన్ ప్రైమ్ సబ్‌స్క్రిప్షన్‌తో ప్రయోజనాలు..
అమెజాన్ ప్రైమ్ సబ్ స్క్రిప్షన్ తీసుకున్నవారికి ఆర్డర్ విలువతో ఎలాంటి సంబంధం లేకుండా ఉచితంగా డెలివరీ సదుపాయం ఉంటుంది. అంటే అమెజాన్‌లో కొనుగోలు చేసిన ఏ చిన్న వస్తువునైనా ఫ్రీగానే ఇంటికి డెలివరీ చేస్తుంది. ప్రైమ్ వీడియో, ప్రైమ్ మ్యూజిక్, ప్రైమ్ రీడింగ్ వంటి సదుపాయాలను సైతం అమెజాన్ అందిస్తోంది. మరోవైపు.. ప్రైమ్ సబ్ స్క్రైబర్ల కోసం ప్రత్యేక సేల్స్ నిర్వహించడం సహా లైటనింగ్ డీల్స్ వంటి సదుపాయాలను కల్పిస్తోంది. అమెజాన్ ప్రైమ్ మెంబర్ షిప్‌ను 2016లో భారత్‌లో తీసుకొచ్చింది. అయితే, నెలవారీ చందా మాత్రం 2018లో అందుబాటులోకి తెచ్చింది. అమెజాన్ ప్రైమ్ సబ్ స్క్రిప్షన్ ప్రతిఏటా పెరుగుతున్నాయి. ఎక్కువ మంది ఈ సదుపాయాన్ని వినియోగించుకుంటున్నారు.

• Read Latest Business News and Telugu News