మ‌న‌దైన ఫేస్ బుక్ కావాలి: ఆనంద్ మ‌హీంద్రా

టెక్నాల‌జీ మీద అంతులేని ప‌ట్టు క‌లిగి, దేశం కోసం ఏదైనా చేయాల‌నే త‌ప‌న ఉన్నోళ్ల‌కు పారిశ్రామిక దిగ్గజం ఆనంద్ మహీంద్రా బంపర్ ఆఫర్ ఇచ్చారు. స్వదేశీ అవ‌స‌రాల‌ను దృష్టిలో ఉంచుకుని సామాజిక మాధ్య‌మాన్ని త‌యారు చేయగలిగే సంస్థకు ప్రారంభ దశలో కావాల్సిన పెట్టుబడి సమకూర్చేందుకు తాను సిద్ధమని ప్రకటించారు. మైక్రోబ్లాగింగ్ సైటు ట్విటర్‌లో ఈ మేరకు ట్వీట్ చేశారు. అమెరికా సోషల్ నెట్‌వర్క్ సైటు ఫేస్‌బుక్ నుంచి యూజర్ల వ్యక్తిగత వివరాలను కేంబ్రిడ్జ్ అనలిటికా అనే సంస్థ సేకరించి .. పలు దేశాల ఎన్నికల ఫలితాలను ప్రభావితం చేసిందని ఆరోపణలు వస్తున్న నేపథ్యంలో మహీంద్రా వ్యాఖ్య ప్రాధాన్యం సంతరించుకుంది.

"నియంత్రణకు సిద్ధంగా ఉండి, ప్రొఫెషనల్‌గా నడిచే సోషల్ నెట్‌వర్క్ కంపెనీ ఒకదాన్ని మనకంటూ ఏర్పాటు చేసుకోవాల్సిన సమయం వచ్చిందేమో అనిపిస్తోంది. ఇది సుసాధ్యం చేయగల భారతీయ స్టార్టప్ ఏదైనా ఉందా? ఒకవేళ ఏదైనా యువ టీమ్‌కి అలాంటి ఆలోచనేదైనా ఉంటే.. అందుకు కావల్సిన సీడ్ క్యాపిటల్ అందించగలను" అంటూ ఆనంద్ మహీంద్రా ట్వీట్ చేశారు. ఇది 1,300 సార్లు రీ-ట్వీట్ కాగా.. 3,300 పైగా లైక్‌లు వచ్చాయి. పలువురు తమ ఐడియాలను కూడా ఆనంద్ మహీంద్రాతో పంచుకున్నారు.