Bank of Baroda: ఈ ప్రభుత్వ బ్యాంకులో ఎఫ్‌డీ అకౌంట్ ఉందా...? అయితే మీకో శుభవార్త!

Bank of Baroda: బ్యాంకు ఆఫ్ బరోడా తన ఫిక్స్‌డ్ డిపాజిట్‌దారులకు శుభవార్త చెప్పింది. రూ.2 కోట్ల కంటే తక్కువ మొత్తాలున్న ఫిక్స్‌డ్ డిపాజిట్లపై(FDs)పై వడ్డీ రేట్లను పెంచుతున్నట్టు ప్రకటించింది. అన్ని టెన్యూర్లపై 35 బేసిస్ పాయింట్ల వరకు ఫిక్స్‌డ్ డిపాజిట్ల వడ్డీ రేట్లు పెరిగాయి. ఈ కొత్త వడ్డీ రేట్లు నేటి(జూలై 28, 2022) నుంచే అమల్లోకి తెస్తున్నట్టు బ్యాంకు ఆఫ్ బరోడా తన వెబ్‌సైట్‌లో పేర్కొంది. 7 రోజుల నుంచి 45 రోజుల వ్యవధి కలిగిన ఫిక్స్‌డ్ డిపాజిట్లపై వడ్డీ రేట్లను బ్యాంకు సమీక్షించింది. ఈ రేట్లను 2.80 శాతం నుంచి 3.00 శాతానికి పెంచింది. బ్యాంకు ప్రస్తుతం 46 రోజుల నుంచి 180 రోజుల వ్యవధి కలిగిన డిపాజిట్లపై 4 శాతం వడ్డీని ఆఫర్ చేస్తుంది. అంతకుముందు ఈ రేటు 3.70 శాతంగా ఉంది.

Also Read : రియల్ ఎస్టేట్ దెబ్బ.. కొవ్వొత్తిలా కరిగిపోయిన బిలీనియర్ సంపద

181 రోజుల నుంచి 270 రోజుల వ్యవధిలో మెచ్యూర్ అయ్యే డిపాజిట్లపై 35 బేసిస్ పాయింట్ల వరకు వడ్డీ రేటును పెంచింది. దీంతో ఈ రేటు 4.30 శాతం నుంచి 4.65 శాతానికి పెరిగింది. అలాగే 271 రోజుల నుంచి ఏడాది కంటే తక్కువ వ్యవధిలో మెచ్యూర్ అయ్యే డిపాజిట్లపై 25 బేసిస్ పాయింట్ల పెంపు చేపట్టింది. దీంతో ఈ వడ్డీ రేట్లు 4.40 శాతం నుంచి 4.65 శాతానికి పెరిగాయి.

ఏడాదిలో మెచ్యూర్ అయ్యే డిపాజిట్లపై 5.30 శాతానికి వడ్డీ రేటు పెరిగింది. ఇది అంతకుముందు 5 శాతంగా ఉంది. మూడేళ్ల కంటే ఎక్కువ వ్యవధిలో మెచ్యూర్ అయ్యే డిపాజిట్లపై వడ్డీ రేటును బ్యాంకు 10 శాతం పెంచడంతో.. ఈ రేటు 5.35 శాతం నుంచి 5.50 శాతానికి పెరిగింది. ఏడాది కంటే ఎక్కువ కాల వ్యవధి నుంచి రెండేళ్లలో మెచ్యూర్ అయ్యే డిపాజిట్లపై రేట్లను యథాతథంగా ఉంచింది. ఈ డిపాజిట్లపై వడ్డీ రేటు 5.45 శాతాన్ని ఆఫర్ చేస్తుంది. బ్యాంకు ఆఫ్ బరోడా సీనియర్ సిటిజన్లకు 3.50 శాతం నుంచి 6.50 శాతం మధ్యలో వడ్డీ రేట్లను ఆపర్ చేస్తుంది.

Also Read : తత్కాల్‌లో టిక్కెట్ బుక్ చేసుకునే వారికి శుభవార్త.. ఇక నుంచి అన్ని ట్రైన్లకు..