Bank Merger: త్వరలోనే మూడు బ్యాంకుల విలీనం: కేంద్రం

బ్యాంకుల విలీనం అంశాన్ని కేంద్రం మరోసారి తెర మీదకు తీసుకొచ్చింది. బ్యాంక్ ఆఫ్ బరోడా, విజయ బ్యాంక్, దేనా బ్యాంకులను విలీనం చేయబోతున్నట్టు ఆర్థిక శాఖ ప్రకటించింది. విలీనం తర్వాత ఏర్పడబోయే బ్యాంకు దేశంలో మూడో అతిపెద్ద బ్యాంకుగా అవతరించనుందని ఆర్థిక సేవల విభాగం కార్యదర్శి రాజీవ్ కుమార్ తెలిపారు. విలీన ప్రక్రియలో ఉద్యోగుల ప్రయోజనాలను కాపాడుతామని ఆయన హామీ ఇచ్చారు. ఎవరూ ఉద్యోగాలు కోల్పోకుండానే ఎస్‌బీఐ అనుబంధ బ్యాంకుల విలీనం జరిగిన విషయాన్ని ఈ సందర్భంగా ఆయన గుర్తు చేశారు.

విలీనం వల్ల నిర్వహణ సామర్థ్యం, కస్టమర్ సర్వీసులు మెరుగవుతాయని రాజీవ్ తెలిపారు. వ్యూహాత్మక బ్యాంకింగ్ సంస్కరణలను తదుపరి దశకు తీసుకెళ్లడానికి ఇదే సరైన తరుణమని ఆయన అభిప్రాయపడ్డారు. గత నాలుగేళ్లలో ప్రభుత్వం అనేక సంస్కరణలను తీసుకొచ్చిందన్నారు. మొండి బకాయిలను తగ్గించడానికి ప్రభుత్వం కృషి చేస్తోందన్నారు.