ఫ్లిప్‌కార్ట్‌‌: బిన్నీ రాజీనామా వెనుక వివాహేతర సంబంధం

ఫ్లిప్‌కార్ట్ సీఈవో పదవికి బిన్నీ బన్సాల్ (37) రాజీనామా చేయడం వెనుక అసలు కారణం వెలుగులోకి వచ్చింది. సంస్థలో గతంలో పనిచేసిన ఓ మహిళతో బిన్నీ వివాహేతర సంబంధం నెరపడం వల్లే ఆయనపై వేటు పడింది. స్వతంత్ర దర్యాప్తు బృందం ఈ మేరకు వివరాలు తెలిపింది. అయితే.. బిన్నీ, సదరు మహిళ పరస్పర అంగీకారంతోనే శారీరక సంబంధం పెట్టుకున్నట్లు వెల్లడించింది. వీరి వ్యవహారం గురించి సంస్థలో పనిచేస్తున్న మరో మహిళ ఫిర్యాదు చేయడంతో విషయం వెలుగులోకి వచ్చింది. ఈ అంశంపై ఆమె జులైలోనే ఫిర్యాదు చేసినట్లు దర్యాప్తు బృందం తెలిపింది.

ఫ్లిప్‌కార్ట్ మాజీ ఉద్యోగితో బిన్నీ వ్యవహారం గురించి తెలిసిన మహిళకు వాస్తవానికి సంస్థతో ఎలాంటి సంబంధం లేదని ఫిర్యాదు చేసిన మహిళ చెప్పినట్లు దర్యాప్తు బృందం వెల్లడించింది. అంతేకాకుండా ఫిర్యాదుదారు తన పేరు బయటకి రావొద్దని కోరడం వల్లే ఆమె వివరాలు చెప్పడంలేదని తెలిపింది..

బిన్నీ బన్సాల్ వ్యవహారానికి సంబంధించి ఇప్పటివరకు ఎలాంటి ఆధారాలు లభించలేదని వాల్‌మార్ట్ ఓ ప్రకటనలో పేర్కొంది. తనపై వచ్చిన ఆరోపణలపై బిన్నీ స్పందించిన తీరు కూడా సరిగాలేకపోవడంతో ఆయణ్ని పదవి నుంచి తప్పుకోమని కోరినట్లు తెలిపింది. తద్వారా కేసు విచారణలో పారదర్శకతతో పాటు ఉద్యోగుల క్షమశిక్షణపై స్పష్టమైన సంకేతాలిచ్చినట్టు వెల్లడించింది.

వ్యక్తిగత ప్రవర్తన సరిగా లేదనే ఆరోపణలపై ఫ్లిప్‌కార్ట్‌ సీఈవో బిన్నీ బన్సాల్‌ ఆ పదవి నుంచి తప్పుకున్న విషయం తెలిసిందే. ఆయన రాజీనామాను వాల్‌మార్ట్ వెంటనే ఆమోదించింది. తన ప్రవర్తనపై వచ్చిన ఆరోపణలను ఆయన ఇంతకుముందే ఖండించారు. అయితే ఈ విషయం విచారణ దశలో ఉన్నందున బిన్నీని రాజీనామా చేసేలా సంస్థ ఒత్తిడి తెచ్చినట్లు తెలుస్తోంది.

వాల్‌మార్ట్ 6 నెలల కిందటే ఫ్లిప్‌కార్ట్‌లో మెజార్టీ వాటాను కొనుగోలు చేసింది. ఫ్లిప్‌కార్ట్ కో ఫౌండర్‌గా బిన్నీ బన్సాల్ సంస్థ పురోగతిలో ప్రధాన పాత్ర పోషించారు. ఫ్లిప్‌కార్ట్‌ను వాల్‌మార్ట్ కొనుగోలు చేసిన తర్వాత సచిన్ బన్సల్ తన పూర్తి వాటాను అమ్ముకొని వెళ్లిపోగా.. బిన్నీ బన్సల్ మాత్రం సీఈవోగా కొనసాగారు.