రూ.49కే అపరిమిత కాల్స్, రూ.36కే 1 జీబీ డేటా

ల్యాండ్‌లైన్‌ కనెక్షన్లను భారీగా పెంచుకోవడమే లక్ష్యంగా పనిచేస్తోన్న ప్రభుత్వ రంగ టెలీకాం సంస్థ బీఎస్ఎన్ఎల్ మరో బంఫర్ ఆఫర్ ప్రకటించింది. ఆదివారంతోపాటు, రోజూ రాత్రి పూట 9 గంటల నుంచి ఉదయం ఏడు గంటల మధ్య ల్యాండ్‌లైన్ నుంచి ఏ నెట్‌వర్క్‌కైనా రూ.49కే అపరిమితంగా కాల్స్ చేసుకునే సౌలభ్యాన్ని ప్రవేశపెట్టింది. ఇప్పటి వరకూ ఈ ఆఫర్ కోసం రూ.99 వసూలు చేస్తున్న బీఎస్ఎన్ఎల్ ఇప్పుడు రూ.50 తక్కువ ధరకే ఆఫర్‌ను అందుబాటులోకి తీసుకొచ్చింది. కొత్త కస్టమర్ల కోసం ఈ ఆఫర్ ప్రకటించినట్లు వెల్లడించిన బీఎస్ఎన్ఎల్ ఆరు నెలలపాటు ఈ ఆఫర్ అందుబాటులో ఉంటుందని తెలిపింది. ఆరు నెలల గడువు ముగిశాక రూ.49 రీచార్జి బదులు సర్కిల్‌ను బట్టి ఛార్జీలు చెల్లించాల్సి ఉంటుందని స్పష్టం చేసింది.

మొబైల్ కస్టమర్ల కోసం కూడా బీఎస్ఎన్ఎల్ ఓ ఆఫర్‌ను ప్రవేశపెట్టింది. రూ.291 ఎస్టీవీ‌తో రీచార్జ్ చేసుకుంటే.. 28 రోజుల కాలపరిమితితో 8 జీబీ 3జీ డేటాను అందించనున్నట్లు వెల్లడించింది. అంటే రూ.36కే 1 జీబీ చొప్పున డేటాను బీఎస్ఎన్‌ఎల్ అందిస్తోందన్నమాట. ఇప్పటి వరకూ ఈ రీచార్జ్‌తో 2 జీబీ డేటా మాత్రమే లభిస్తుండగా.. దాన్ని ఇప్పుడు నాలుగు రెట్లు పెంచింది. రూ.78 రీచార్జ్‌తో 2 జీబీ డేటా పొందవచ్చని, దీని కాలపరిమితి ఐదు రోజులని తెలంగాణ టెలీకాం సర్కిల్ సీజీఎం అనంతరామ్ తెలిపారు.