Mahila Savings: మహిళలకు గుడ్‌న్యూస్.. పోస్టాఫీసుల్లో కొత్త స్కీమ్ షురూ.. ఎలా అప్లై చేసుకోవాలంటే?

Mahila Savings: కేంద్ర ప్రభుత్వం మహిళలు, బాలికల కోసం కొత్త పొదుపు పథకాన్ని ప్రకటించిన విషయం తెలిసిందే. ఆజాదీకా అమృత్ మహోత్సవంలో భాగంగా ఈ పథకాన్ని వార్షిక బడ్జెట్ 2023-24 బడ్జెట్‌లో భాగంగా మహిళా సమ్మాన్ సేవింగ్స్ సర్టిఫికెట్ పొదుపు పథకాన్ని (Mahila Samman Savings Certificates) ప్రకటించారు ఆర్థిక మంత్రి నిర్మలా సీతారామన్. ఈ కొత్త పథకం ఏప్రిల్ 1 నుంచి అమలులోకి వచ్చింది. ఈ మేరకు కేంద్ర ఆర్థిక మంత్రిత్వ శాఖ శనివారం అర్ధరాత్రి తర్వాత గెజిట్ నోటిఫికేషన్ విడుదల చేసింది. దేశ వ్యాప్తంగా ఉన్న మొత్తం 1.59 లక్షల పోస్టాఫీసుల్లో ఈ పథకాన్ని తక్షణమే అందుబాటులోకి తీసుకొస్తున్నట్లు పేర్కొంది.

మహిళా సమ్మాన్ సేవింగ్స్ సర్టిఫికెట్ పొదుపు పథకాన్ని మహిళలు లేదా బాలికల పేరుపై మాత్రమే తెరిచేందుకు వీలుంటుంది. ఈ పథకం ఏప్రిల్, 2023 నుంచి మార్చి, 2025 వరకు రెండేళ్లపాటు అందుబాటులో ఉంటుంది. ఈ పథకాన్ని 7.50 శాతం మేర స్థిరమైన వడ్డీ లభిస్తుంది. ఇందులో గరిష్ఠంగా రూ.2 లక్షల వరకు పొదుపు చేసుకోవచ్చు. ప్రస్తుతం ఈ పథకం కేవలం పోస్టాఫీసుల్లోనే అందుబాటులోకి వచ్చింది. అయితే, బ్యాంకుల్లోకి ఎప్పుడు తీసుకొస్తారనే విషయంపై స్పష్టత లేదు.

మహిళా సమ్మాన్ సేవింగ్స్ స్కీమ్ ఎలా దరఖాస్తు చేసుకోవాలి?

• సమీపంలోని పోస్టాఫీసుకు వెళ్లి మహిళా సమ్మాన్ బచత్ పత్ర యోజన దరఖాస్తు ఫారాన్ని తీసుకోవాలి.
• మీ వ్యక్తిగత, ఆర్థిక వివరాలతో పాటు నామినీ వివరాలను అందులో పొందు పరచాలి.
• మీ గుర్తింపు, అడ్రస్ ప్రూఫ్ కోసం అవసరమైన ఆధార్, పాన్ కార్డు వంటి డాక్యుమెంట్లను జత చేయాలి.
• డిపాజిట్ ఎంత చేస్తున్నారనేది తెలియజేయాలి.
• నగదు లేదా చెక్కు రూపంలో డిపాజిట్ చేయవచ్చు.
• ప్రక్రియ పూర్తయిన తర్వాత మీ పెట్టుబడికి రుజువుగా సర్టిఫికెట్ ఇస్తారు.
• ఈ పథకం ట్రాన్సాక్షన్ రసీదు కాగితం రూపంలో కావాలంటే రూ.40, ఎలక్ట్రానిక్ రూపంలో కావాలంటే రూ.9 ఛార్జీలు వసూలు చేస్తారు.
• ఇందులో ఏడాది తర్వాత కొంత మొత్తాన్ని తీసుకునే వెసులుబాటు ఉంది. డిపాజిట్ మొత్తంలో 40 శాతం వరకు వెనక్కి ఇస్తారు.
• గడువు పూర్తయ్యే వరకు ఖాతాను మూసివేసేందుకు కుదరదు. అయితే, అకౌంట్ హోల్డర్ చనిపోయినా, తీవ్ర అనారోగ్యానికి గురైనా ముందస్తుగా ఖాతాను రద్దు చేసుకోవచ్చు. కానీ, అప్పటికీ ఖాతా తెరిచి కనీసం ఆరు నెలలు గడిచి ఉండాలి.
• మహిళా సేవింగ్స్ సమ్మాన్ స్కీమ్‌తో పాటు ఇతర పొదుపు పథకాలపైన పీపీఎఫ్, సుకన్య సమృద్ది యోజన వంటి వాటిల్లో కీలక మార్పులు చోటు చేసుకున్నాయి.

• Read Latest Business News and Telugu News